Nuuk: Nakorsiarniarlutik sianertut amerlalluinnarneri peqqinnissaqarfimmut artukkiivoq

Nuummi peqqissaavik innuttaasunik nakorsiarniartunit ullaakkut sianerfigineqartartoq, amerlanerusunit sianerfigineqartalersimavoq. Piffissani siarnuffiunerusuni nakorsiarniarlutik sianersimasut 100-t missaat sianerfigeqqinneqanngitsoortartut, qitiusumik peqqissaavimmi nakorsaaneq oqaluttuarpoq.

Nuummi peqqissaavimmut nakorsiarniarlutik ullaakkut sianertut amerlanerulipiloorput.

Sermersuumi qitiusumik peqqissaavimmi nakorsaanerup Jesper Olesenip tamanna uppernarsarpaa.

Nakorsaanerup Jesper Olesenip Sermitsiaq.AG-mut oqaluttuarereernikuua nakorsamut saaffiginnittariaatsip allanngortinnerani sianertartut amerlanerulersinnaanerat naatsorsuutigineqarsinnaasoq. Nakorsap oqarasuaataanut saaffiginnittarneq september 2021-mi allanngortinneqarpoq.

Aatsaalli sapaatit akunneri sisamat kingulliit nakorsamut saaffiginnittut amerlalluinnalersimapput.

Jesper Olesen ilisimatitsivoq Nuummi nakorsamut sianertut ullormut 200-t missaat sullinneqarsinnaasartut. Sapaatit akunnerinili sisamani kingullerni ullormut 300-t missaat sianertarput.

- Tamanna ajoraluartumik isumaqarpoq innuttaasut arlalippassuit sianerfigeqqinneqanngitsoortarnerannik, Jesper Olesen nassuiaavoq.

Piffissaatigineqartut killeqartut

Sianertut angumerineqarsinnaasut sipporlugit sianertoqartarnerata saniatigut peqqissaaviup nakorsiarnissamut ullormut piffissaatigisai killeqarput, peqqinnissaqarfimmi sulisut amigaatigineqarmata.

- Tassa imaappoq innuttaasut nakorsamiilluunniit sianerfigineqaqqissimagaluarunik, ilaanni piffissamik tunineqanngitsoorsinnaasarput, qitiusumik peqqissaavimmi nakorsaaneq Sermitsiaq.AG-mut ilisimatitsivoq.

Aaqqiissuteqarnissamut periarfissaqarpoq

Jesper Olesen oqaluttuarpoq peqqinnissaqarfimmi sulisut pikkorissarnerisigut, nakorsiartumillu oqaloqateqarnermi erngertumik eqqortumut innersuussisinnaalernissamut paasissutissanik naammattunik katersisinnaanermik ineriartortitseqqiinikkut ajornartorsiut aaqqinniarsarineqarsinnaasoq.

Nakorsamulli saaffiginninniarlutik sianertut eqaannerusumik sullinneqarnissamut aamma iliuuseqaqataasinnaasut, oqaatigaa.

Nakorsap oqarasuaataanut sianinnginnermi uku piareersimatinneqarsinnaasut, nakorsap siunnersuutigaa:

  • Ateq, Inuup normua aamma oqarasuaatip normua
  • Napparsimalernerup ingerlarna
  • Suna pineqarpa?
  • Qanga aallartippa?
  • Qanoq allanngoriaateqarpa?
  • Siornatigut misigereernikuua? Qanga?
  • Nammineq imminut nakorsarniarsimavit?
  • Allattuinissarnut pappialat aqerluusarlu piareersimatikkit
  • Peqqissaavimmut saaffiginninnerni qanoq siunnersorneqarusunnerlutit qanorlu misissorneqarusunnerlutit naatsorsuutigisatit piareersimatikkit.
Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS