Nuuk: Klassit meeqqeriviillu marlunngorpat ammaqqissapput
Nuummi Timmiaaqqat, AKO Narsarmiutaq USK-imilu klassit pingasut coronamik tunillatsittoqarsimanera pissutigalugu matoqqatinneqartut marlunngorpat ammaqqissapput.
Nuummi klassit sisamat meeqqeriviillu pingasut Coronamik tunillatsittoqarsimanera pissutigalugu sapaatip akunnerani kingullermi matoqqatinneqarsimapput. Tunillaatiararsuaq Delta-varianti pineqarmat tunillatsissimasut tamarmik misissoteqqinnermi tunillatseqqajunnaarsimallutik nalunaarfigineqarnissamik tungaanut, ulluni arfineq-marlunni angerlarsimaannartussanngorlugit angerlartinneqarsimapput.
Marlunngorpat Timmiaaqqat, Narsarmiutaq USK-imilu klassit pingasut ammaqqinneqassapput, ASK-imili klassi ataaseq septembarip 16-iani ammaqqinneqassalluni. Kommuneqarfik Sermersuumit ataasinngornerup ualiani taamatut ilisimatitsipput.
Nunatsinni Nakorsaaneq peqatigalugu meeqqeriviit atuarfinnilu klassit ammaqqinneqarnissaat aalajangiunneqarsimavoq.
Meeqqerivimmi Timmiaaqqani, AKO Narsarmiutami USK-imilu klassini pingasuni meeqqat sulisullu ullumi ataasinngornermi misissoqqinneqarput. Misissortinnermi tunillatsissimanngittut uteqqissinnaasut ilisimatitsissutigineqarpoq.
AKO Illumi ASK-imilu klassimi ataatsimi meqqat inersimasullu septembarip 15-iani misissoqqinneqassapput. Tunillatsissimanngittut tallimanngornermi septembarip 16-ani uteqqissinnaapput.
Inuit misissortissimanngitsut atuarfiup meeqqeriviulluunniit matuneranit ullut 14-it qaangiunneqarnni aatsaat atuarfimmut meeqqerivimmulluunniit utersinnaapput. Tassa Timmiaaqqat, Narsarmiutaq USK-ilu septembarip 24-at taakku aatsaat uterfigisinnaavaat, kiisalu Illu ASK-ilu septembarip 26-ani aatsaat uterfigineqarsinnaallutik. Meeqqat marluk inorlugit ukiullit kisimik piumasaqaammut tassunga ilaatinneqanngillat, tassa ilaqutariinni tunillaasimasutut ilisimaneqanngitsumit tunillatsissimanngittuneersuusut, kommuni ilisimatitsivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...