London Mining Greenlandip saviminissamik piiaanissamut atuisinnaanermut Nuup Kangerluani Isuani akuersissitini sivitsortippaa.

Naalakkersuisut oktobarip sisamaanni, ingerlatseqatigiiffik kiinamiunit pigineqartoq sivitsuiffigaat.

Piffissaliussat nutaat

Kiniiserit maanna 2021-iutinnagu piianermik suliniummik atuinissamut aamma matusinissamut pilersaarummik tunniussisussanngorput, Naalakkersuisut ataatsimiinnerisa eqikkarneqarnerani tamanna atuarneqarsinnaavoq.

Piffissamut killiliussat allaat sivitsorneqartut:

• Ingerlatsinissamut aningaasassaqarluni uppernarsaat: Piffissamut killiliussaq 31. december 2021
• Aatsitassanik piiaanerup aallartissimanissaanut pisinnaatitsissummik pigisaqartumut killissaliussaq: Kingusinnerpaamik 31. december 2025

London Mining Greenland 2013-imi saviminiliassanik suliniummut akuersissuteqalerpoq, kisianni 2015 aningaasaataarupput, ingerlatseqatigiiffillu kiinamiunut General Nice Development Limitedimut tunineqarpoq, taanna Hong Kongimi pilersinneqarsimavoq.

Suliniummut akerliussutsimik takutitsineq

Nuup Kangerluani piiaaffimmik suliniummut Naalakkersuisut akuersissuteqarniarnerat, 2012-mi aalassatsitsivoq. Nuummi akerliussutsimik takutitsisoqarpoq.

Ingerlatseqatigiiffiup pisortai arlaleriarlutik taarserneqartarput, saviminissallu akiisa apparnerit piiaaffissatut suliniummut piffissat pilersaarutaasimasut kigaallatsinneqarput.

Neriuutaarutinngitsut

Kiinamiut piginnittut saviminissamik piiaaffimmik pilersitsinissamut pilersaarutertik taamaatissimarpasinngilaat, maannalu aningaasaliisussat pisariaqartinneqartut nassaarinissaanut piffissaqalerput. Ukiuni marlunni kingullerni ingerlatseqatigiiffiup suliai uninngasimapput.

Suliniutinut angisuunut inatsimmut tunngatillugu suliniut taamanikkut akuerineqartuni siullersaavoq, taanna atuisinnaanermut akuersissummut sinaakkusiisuuvoq.