Nuuk: Kalaallit naatitaannik maanna pisiniarfimmi pisisinnaanngorputit
Greenlandic Greenhousep niuerfitsik annertusileruttorpaat. Suliffeqarfiup naatitaatini akunnittarfinnut neriniartarfinnullu siornali tunisarpai. Maanna nioqqutaataat Pisiffimmi Brugsenimilu pisiarineqarsinnaalerput.
Nuummi innuttaasut maanna salatinik, naasunik mamasaartissanik assigiinngitsunik allanillu naatitanik Kalaallit Nunaanneersunik nutaanik pisiniarfinni pisisinnaanngorput.
Nuummi suliffeqarfik naatsiivilerisoq Greenlandic Greenhouse Nuummi Pisiffik aamma Brugseni isumaqatigiissusiorfigai, suliffeqarfiup taamaalilluni nioqqutissaatini nutaat pisiniarfinni tuniniarsinnaalerlugit. Greenlandic Greenhouse ulluni makkunani ilaatigut Qinngutsinni Pisiffimmi ooqattaartitsilluni aaqqissuivoq.
- Ilungersornarpoq. Maani nunami taamatut nutaamik aallartitsilluni suliaqarluni ilungersornartorujussuuvoq. Kisianni aamma soqutiginarpoq, nuannerpoq aamma unamminarpoq. Siorna aallartikkatta peqqissiminngilagut, Nicklas Birkely, Greenlandic Greenhousemi piginneqataasoq oqaluttuarpoq.
Suliffeqarfik naatitanik maannamut tunisassiaminik Nuummi akunnittarfinnut neriniartarfinnullu tunisisarsimavoq. Maanna pisiniarfinnut pisiniartartut aamma naatitanik nutaanik najukkami naatinneqartunik pisisinnaanngorput.
Quersuaq naatitsivittut
Greenlandic Greenhouse Nuummi naatitsiveqarput, tassani naatitatik aamma naasut mamassaatissat quersuarmi angisuumi, siornatigut qisuusiviusimasumi naatittarpaat. Naatitat qulliit LED-it atorlugit naatinneqartarput, sorlaallu imermut naggorissaaserlugit ikineqartarput, imertaa salinneqariarluni atoqqinneqartarluni.
- Nioqqutissaatigut maannamut Nuummi Pisiffimmi aamma Brugsenimi pisiarineqarsinnaapput. Kisianni allileriniarluta pilersaaruteqarpugut, taamaalilluni siunissami illoqarfinni allani najukkameersunik naatitaqalissalluni, Nicklas Birkely oqarpoq.
Suliffeqarfiup kalaallit igasut suleqatigereerai taanna ilisimatitsivoq, taakku suliffeqarfimmit nioqqutissanik pissarsisarput, illoqarfinni allani akunnittarfinni aamma neriniartarfinni atorsinnaasaminnik.
Suliffeqarfiup aamma mamarsaatissat tupaarnat, kuannit aamma qajaasat. Igasup Inunnguaq Hegelundip kalaallit naasutaat mamarsaatissaannik naatitsinermi suliffeqarfik ikiortarpaa.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...