Nuuk: Imerniartarfik neriniartarfinngortinneqartoq
Nuup qeqqani neriniartarfimmik imerniartarfimmillu piginnittunngortut nutaat, imerniartarfiup Takussip inikuani neriniartarfimmik aqangu ammaassapput.
Aurum, latinerisut isumaqartoq kuulti, neriniartarfissap (brasserie) nutaap taaguutigissavaa.
- Maajip aallaqqaataani ammarnissatsinnut piareersimaniarluta init tapiitilersorlugillu qalipappagut, Larseeraq Chrmnitz Egede Nicolaj Haagen Olsen peqatigalugu, Helge Tangip Carl Juhlillu neriniartarfiutaannik, imerniartarfiutaannik immiorfiutaannillu februaarip qaammataani pigisaqalersimasoq ilisimatitsivoq.
- Brasseriamik eqqissilluni nammineq immiorfiutitsinniit viinisorfiullunilu immiaarartorfiusinnaasumik, aammali igasutta Miki Siegstadip Peter Berthelsenillu nerisassiaanik neriffiusinnaasumik pilersitsinissarput takorloortarsimavarput, Larseeraq Chemnitz Egede Sermitsiaq.AG-mut ilisimatitsivoq.
Inuussutissat nunatsinneersut
Sapaatip akunnerisa naaneranni ullaakkorsiortoqarsinnaassaaq. Ullut tamaasa ullup qeqqasiortoqarlunilu unnukkut nerisassat pingasut sassaalliutigineqarsinnaassapput.
Brasserie
Frankrigimi, Flandernimi franskillu nerisassaataannik nerisassiortarfinni brasserie neriniartarfiuvoq, ajornaatsumik nerisassianik nerisassanillu allanik sassaallerfiusinnaasoq. Oqaaseq, brasserie, fanskisut "immiorfimmik" isumaqarpoq, tassungalu ilassutitut "immiornermik suliffeqarfilluni". Pissarsiffik: Wikipedia
- Nerisassat nungusaataanngittumik tunngaveqarluni sassaalliutigineqartassapput, inuussutissallu nunatsinneersut nerrivimmi qalilimmi nerineqartarnissaat pingaartinneqarluni, Larseeraq Chemnitz Egede oqaluttuarpoq. Nerineqarsinnaasut tassaanerarpai saarulliit, saattuat savaaqqallu qatigaanit nerisassiat nutaat aamma kinguleqqiutit ilaattut paarnat.
Nipilersortarfeeraq atuutsinnarneqarsimavoq, neriartorsimasut taamaalillutik guitarertartumit aliikkusersorneqarsinnaapput. Pilersaarutaavorlu nerisoqareernerani nipilersortartut assigiinngitsut nipilersortarnissaat.
Uggornartoq
Coronap ajornartorsiortitsinera killilersuinerpassuillu piginnittunut nutaanut ugguartitsisimapput. Neriniartarfinnik imerniartarfinnillu piginnittuulernermit qaammat ataaseq qaangiutiinnartoq, oqartussat inerteqquteqalerput matusariaqarnerannik kinguneqartumik.
- Aningaaseriviup eqaattumik sullissinera qujamasuutigisimaqaarput. Naatsorsuutigaarpullu ikiorsiissutinit pissarsiumaarluta, Larseeraq Chemnitz Egede, matoqqanerup nalaani suliffeqarfiup ilaa ammtinniarlugu nerisassanik nammineerluni aattuisariaqartarsimasoq ilisimatitsivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...