Nuuk: Festivalimi filminik takutitseqqaartoqassasoq
Kalaallit filmiliaat arlallit Nuuk International Film Festivali sapaatip akunnerata tulliani aallartinneqarpat siullermeersumik takutinneqassapput.
Nuuk International Film Festival Katuamik suleqateqarluni sisamassaanik septembarip 16-ianiit 19-iata tungaanut ingerlanneqarpat filminik takusassaqarluarpoq.
Filmit 3.000-it sinnerlugit amerlassusillit nunait assigiinngitsuni 120-nit filmfestivalimut nassiunneqarsimapput, festivalillu sammisassaqartitassai 76-inik quppernillit aatsaat taamak annertutigisut qanittukkut saqqummiunneqarpoq.
Festivalimi aqutsisut tusagassiorfinnut nalunaaruteqarnermi taamatut oqaluttuartoqarput.
Festivalip ammaanersiorneqarnerani filmi "One Day in the Life of Noah Piugattuk", canadamioq Zacharias Kunuk ilitsersuisoralugu suliarineqarsimasoq takuteqqaarneqassaaq.
Ajunaarneq pillugu filmiliaq siullermeersumik takutinneqassasoq
Ilitsersuisoq nunarsuarmi ilisimaneqarluarpoq, siusinnerusukkut Canesimi filmfestivalertoqarnerani Det gyldne Kamera-mik pissarsisimalluni.
Festivalimi aamma Kalaallit Nunaanni filmiliat siullermeersumik takutinneqassapput. Taakku tassaapput Nivi Pedersenip naatsumik filmiliaa "Updated", Anders Berthelsenip "Blok 5"-imi qaartoqarnerani ajunaartoqarnera pillugu piviusulersaarusiaa aamma Inuk Jørgensenip filmiliaa "In the Shadow of the Tugtupite".
Piviusulersaarusiaq ”Kampen om Grønland” oqaluuserineqarsimaqisoq arfininngorpat takutinneqassaaq.
Arfininngorpat unnukkut naatsumik filmilianit pitsaanerpaamut aamma takisuumik filmilianit pitsaanerpaamut naliliisartut nersornaataat agguaanneqassapput, soorlu aamma Kalaallit Nunaanni filmiliortartut peqatigiiffiata, FILM.GL-ip ukiumoortumik nersornaasiuttagaat, Innersuaq nersornaasiunneqassasoq.
Covid-19-imut annilaanngateqarneq
Festivalimik aaqqissuussisimasut naapertorlugit, piareersaaneq Cocvid-19-imut annilaanngateqarnermik annertuumik sunnerneqarsimasoq:
- Taamaammat nuannaarutigilluinnarparput filmfestivalimut takkulluni isiginnaariartoqarsinnaanera, pissusissamisoortumillu filmertarfimmi filminik takutitsisinnaanerput, festivalimik aqutsisoq Pipaluk K. Jørgensen oqarpoq, nangillunilu
- Nunanit tamalaanit ilaasussaagaluit, nunarsuarmi tuniluuttoqarnera pissutigalugu maanngarsinnaasimanngitsut video aqqutigalugu peqataassapput, tamanna aqqutigalugu nuimasut, soorlu Canadami ilitsersuisartoq Zacharias Kunuk aamma Bird Runningswater Sundancemeersoq Nuummut tikilluaqqusinnaanngorpavut, taanna oqarpoq.