Nuuk: Coronamut misissortiffik tamanut atuutilersoq
Nappaammut covid-19-imut ersiuteqartut tamarmik, aamma nunatta avataaniit Nuummut tikinnerminnit misissorteqqittussat tamarmik Nuummi misissortittarfimmi ataasiinnarmi misissortittalersimapput. Angalasimasulli allallu misissortittussat akulerutsinneqarneq ajorput.
Nuummi innuttaasur Covid-19-imut ersiuteqartut, aamma inuttaasut nunatta avataanit Nuummut tikinnerminnit ullut tallimassaanni misissorteqqittussat tamarmik sumiiffimmi ataatsimi misissortittalersimapput. Tassa misissuisarfimmi illoqarfiup qeqqaniittumi, Brugsenip saniani.
Misissungassanik tigusisarnerit sumiiffimmut ataatsimut siorna novemberimi katersorneqarput.
- Tamassumunnga pissutaavoq suliffiit assigiinngitsut marluk suliffiginissaat pisariungaatsiarmat. Sulisut atortuusinnaasullu nuuttaqattaartuartariaqarsimapput, nakorsaaneq Henrik L. Hansen Sermitsiaq.AG-mut ilisimatitsivoq.
- Misissungassanik tigusisarnerit aamma akiuussutissalersiuinerit suliaapput piffissartornarsinnaasut sulisoqarnikkullu atuiffiungaatsiarsinnaasut. Taamaammat pisariaqarsimavoq suleriutsinik pisariillisaanissaq, nakorsaaneq oqarpoq.
Aallaqqaataani avissaartinneqartut
Misissortittarfik oktoberip qiteqqunnerani 2020-mi ammaqqaarmat nunatsinnut tikinnerminnit ullut tallimassaanni misissorteqqittussat kisimik misissortittarfigisimagaluarpaat. Innuttaasut allat Covid-19-imut ersiuteqartut peqqinnissaqarfimmut saaffiginnittarput, Dronning Ingrid Napparsimmavissuanilu misissortittarsimallutik.
Misissortittussat tamarmik sumiiffimmi ataatsimi misissortittalernerannut atatillugu nakorsaaneq qularnaarivoq inuit nappaammut ersiuteqarsinnaasut misissortittarfimmi allanut akulerutsinneqarnavianngitsut.
- Angalallutik tikittussat Kalaallit Nunaannut aallannginnerminni misissorteqqinnissamut piffissamik tunineqareertarput, tassa ullaap tungaani. Inuit tunillatsissimanermut ersiuteqarsinnaasut ullup ingerlasimalereernerani kingulliullutik misissortittarput. Maannakkut pissutsit isigissagutsigit nunatsinnut tikittut akornanni tunillatsittoqarsimasinnaanera ilimanaateqarneruvoq, Henrik L. Hansen ilisimatitsivoq.
Misissortittarfiup iluani annertuumik eqqiluisaartoqarpoq. Misissuinerit tamaasa ipertaajaasoqartarpoq, allap misissungassamik tigusiffigilinnginnerani.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...