Nuuk: Brugsenimi nioqqutissanut ilisiviit imaqanngivissut
IT-kkut atortorissaarut nutaat pissutaalluni Brugsenimi nioqqutissanik inniminniiniarneq ajornartorsiutigineqarpoq, tamannalu Nuummi paarnanut naatitanullu ilitsivinni takuneqarsinnaavoq. Sapigaqartunut iisartakkat pisiarineqarsinnaasut maannakkorpiaq aamma amigaatigineqarput.
Innuttaasut arlallit Brugsenimi Nuummiittumi ilitsiviit imaqannginnerat tupigusuutigisimavaat. Paarnat naatitallu, nioqqutissat nillataartitsivimmiittussat qallersuutissallu kiisalu sapigaqartunut iisartakkat maannakkorpiaq amigaatigineqarput.
Brugsenimi tuniniaanermut pisortap Jes Nyborgip Sermitsiaq.AG-mut oqaluttuara, IT-kkut atortorissaarut nutaaq ajornartorsiortitsisuusoq.
- Atortorissaarupput allanngortitileruttorparput, tamatumalu malitsigisaani qinnutigisimasavut atortorissaarutitsinni tammartarput, Inniminnigassavut inniminnertarpavut, inniminnikkavulli nalunaarsorneqaratillu nassiunneqarneq ajorput, tuniniaanermi pisortaq oqaluttuarpoq.
Pilersuisumit sapigalinnut iisartagaateqartoqanngitsoq
Tamatuma malitsigisaanik umiarsuaq tallimanngormat Danmarkimiit tikittoq paarnanik naatitanillu useqanngilaq, tamannalu pisiniarfinni takuneqarsinnaalluarpoq.
Alla innuttaasut arlallit amigaatigisaat tassaavoq, sapigalinnut iisartakkat. Taakkununngali tunngatillugu allarluinnarmik pissuteqartoq, Jes Nyborg.
- Iisartakkat Pilersuisumut inniminnertarpavut, taakkuli suuteqanngikkaangata tunniussisinnaanata.
Pilersuisumi Immikkoortunut pisortaq Egon Ringsted Sermitsiaq.AG-mut oqaluttuarpoq, tamanna inuup kukkussuteqarsimeranik pissuteqartoq.
- Inniminniineq decembarip qaammataani ajutoorsimavoq, tamatumalu kingunerani suli tikittoqarsimanani, Egon Ringsted oqarpoq.
Amerlasoorpassuarnik inniminniisimasut
Iisartakkat pisiniarfinni pisiassat qanoq atorneqarnissaat pillugu kalaallisut allassimasoqartussaapput, taamaammallu inniminniinermiit tunniussinissamut qaammat ataaseq ingerlasinnaasarluni.
- Tamatumani Nuuk kisimi pinnani sinerialli tamarmik sunnerneqarsimavoq. Piffissami sivisulaartumik nioqqutissaateqarsimanngikkaagatta, takkuttut sukkasupilussuarmik nungunneqartarput. Qaammatilli matuma 29-ani Nuummut tikittussamut ilaatitassanik amerlasoorpassuarnik inniminniisimavugut.
Immikkoortunut pisortap innuttaasut nukillalaarsimanerat paasisinnaanerarpaa.
- Soorunami kukkusimaneq pisussaanngikkaluartoq pisimammat ajuusaarpugut. Tamatuma peqqinnginnissaa anguniarlugu amerlasoorpassuarnik inniminniisimavugut, taanna naggasiivoq.
Brugsnemi aamma nioqqutissanik inniminniisarneq immikkut ukkatarineqalersimavoq. Tuniniaanermi pisortap oqarasuaatikkut oqaluussilluni qulakkeersimavaa, nioqqutissat inniminnerneqarsimasut sapaatip-akunnerani matumani umiarsuarmut ilaatillugit tallimanngorpat arfininngorpalluunniit pisiniarfinni pisiarineqarsinnaalernissaat.
-Atortorissaarutittat ajunngitsumik ingerlaqqilernissaata tungaanut inniminnikkavut marloriarluta misissortalerpavut, taamaalilluta nioqqutissanik amerlanerusunik amigaateqalinnginniassagatta, Jes Nyborg oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...