Nuuk: Arnaq imigassartorsimasumit aporneqartoq - biilertoq iperagaavoq
Arnaq 50-it sinnerlugit ukiulik ippassaq arfininngornermi Nuummi imigassartorsimasumit aporneqarpoq. KNR taama allaaserisaqarpoq.
Angut 60-it sinnerlugit ukiulik Nuummi arnamik HJ Rinksvejimi pisuinnaat aqqutaatigut ingerlasumik apuisimasutut tigusarineqarpoq. Politiit oqarnerat naapertorlugu angut imigassartorsimavoq. KNR taama allaaserisaqarpoq.
Killisiorneqareerluni iperagaasoq
Nuummi politiini pigaartoq, Kunuk Frederiksen, Sermitsiaq.AG-mut ilisimatitsivoq, angut killisiorneqareerluni iperagaasimasoq. Kisianni suliami unnerluutigineqassaaq, kingornalu eqqartuussivikkut suliassanngortitsisoqassalluni.
Angummut 60-it sinnerlugit ukiulimmut qanoq unnerluussuteqartoqassanersoq, pigaartup maanna ilisimatitsissutigisinnaanngilaa.
Ulorianartorsiunngitsoq
Nuummi politiit arnap aporneqarnermini qanoq ajoqusersimatiginera oqaatigisinnaanngilaat, kisianni ulorianartorsiunngitsoq oqaluttuaraat.