Nuuk: Arnaq aportinnermi kingorna inuunerminik ulorianartorsiortoq

Arnaq Nuup illoqarfiata qeqqani sapaatip ataasinngornerullu akornanni unnuakkut biilimit aportikkami ajoqusingaatsiarsimavoq. Arnaq biilimut kiggigussaasimavoq, ajutoorfimmilllu kilometerip ataatip ungasissuaani aatsaat tassani takuneqarsimalluni.

Angut 25-nik ukiulik sapaatip ataasingornerullu akornanni unnuakkut Nuup illoqarfiata qeqqani arnamik aporsisimasoq tigummigallarneqarpoq.

Atisaarniarfiup Nuka Din Tøjmandip Aqqusinersuarmiittup saavani unnuakkut ataatsip qeqqata missaani apuineq pisimavoq, angullu aporsisoq ilaatigut imigassartorsimalluni biilersimasutut unnerluutigineqarpoq.

Kalaallit Nunaanni Politiit pigaartuisa pisortaat Julie Senderovitz Bendtsen Sermitsiaq.AG-mut taamatut ilisimatitsivoq.

Pigaartut pisortaat naapertorlugu, 25-nik ukiullip nassuiaatigisimavaa, arnamik aporsisimanini nalusimallugu. Aatssaalli illoqarfiup immikkoortortaani Nuussuarmi biilimit anigami aporsisimanini paasisimallugu.

Biilimut kiggisussaasimasoq

- Biilertup biilinit anigami arnaq taanna aatsaat takulersimavaa. Arnaq biilip kofangeriata assakaasuatalu siulliup akornanni kiggigussaasimavoq.

- Biilimik ingerlatsisimasoq ambulancenut sianersimavoq. Ambulance takkummat politiit aggersarneqarsimapput angummillu tigusarinnillutik, Julie Senderovitz Bendtsen oqaluttuarpoq.

Arnaq aporneqarsimasoq suli uumavoq, politiilli paasissutissaataat naapertorlugit inuunera ulorianartorsiorluni. Arnaq aportissimasoq Nuummi najugalik 50-ikkunnik ukioqarpoq.

Takunnissimasinnaasunik ujaasisut

Politiit misissuinerisigut aporsinermi qanoq pisoqarsimanersoq qulaajaaffigineqassaaq.

Tassunga atatillugu Aqqusinersuarmi unnuakkut ataatsip qeqqata missaani takunnissimasinnaasunik politiit ujaasipput.

Inuit aporsinerup nalaani apuiffimmiissimasut oqaloqatigerusuppaat, aamma aporsinermik takunnissimanngikkaluarpataluunniit.

Angut aporsisimasoq 25-nik ukiulik imigassartorsimalluni biilersimasutut maannamut unnerluugitineqarallarpoq. Tamatuma saniatigut paragraffinik marlunnik unioqqutitsisimasutut, inuup inuuneranik pisinnaasaanillu ulorianartorsiortitsisimanermut attuumassuteqartut pillugit unnerluutigineqarpoq.

Sermersuup Eqqartuussivianit aalajangiunneqarsimavoq, politiit pisimasumik misissuineranni angut tigummigallarneqassasoq.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS