Nuuk: Annaassiniaasut tallimat nersorneqarput
Nuup eqqaani Kangerluannguami annaassiniaasut tallimat sapiitsuliorsimanerannut ullumi tallimanngornermi nersorniarneqarput.
Kangerluarsunnguami annaassiniarneq annilaarnartumik inerneqarpoq, angut qamuteralalluni sikukkut nakkarmat marsip arfineq pingajuani ukioq manna.
Jaqqa Grønvold siulliit ilagalugit takkuppoq. Nangaarianngivilluni nammineq inuunini naviarnartorsiortillugu qamuteralamminik ajornartorsiortoq ikiorniarsarilerpaa, namminerli aamma sikukkut nakkarpoq.
- Taamaattumik Air Greenlandip qulimiguulia aggeqquneqarpoq. Timmisartumik aquttoq Joachim Hytten, vicepolitiinspektør Kunuk Frederiksen kiisalu qamuteralattartut kajumissutsiminnik ikiuukkiartortut Poul Due Hansen aammalu Lars Borris Pedersen navianarsinnaasumik annaassiniarlutik aallartipput, politiit tusagassiutinut nalunaarummi allapput.
Angutinut tallimanut annaassiniaaqataasunut nersorinninnermut atatillugu tusagassiutinut nalunaaruteqarput.
Ikinngutaalluartoq angerlanngitsoorpoq
Jaqqa Grønvold ikiuukkiartortunit imaanit qaqissinnaasimavaat inuuneralu annaallugu. Ajjutoortup aappaa uumanngilaq, uummarsaraluaramikkulu ajoraluartumik kingusinaareersimapput.
Nersornaasiisoqarneranut atatillugu qaaqqusinermi misigissutsit assigiinngitsut pigineqarput.
- Angutit ikiuukkiartortut nuannaarluta nersortussaagaluarpagut. Annernaraluaqisumilli nalunngilarput ikinngutaalluartoq ataaseq angerlanngitsoormat. Qamuteralannimmi angalaartilluni ajunaarpoq, politimesteri Bjørn Bay oqalugiarnermini oqarpoq.
Joachim Hyttenip immikkoorluinnartumik qulimiguulimmik aquttuunerata aammalu Kunuk Frederiksenip politiitut aalajangigaasa kinguneranit Jaqqa Grønvoldip inuunera annaassinnaasimavaat, angutillu tallimaasut inuunitik peqqissutsitillu annertuumik navianartorsiortippaat.
Sapiitsuliortut
Angutit annaassiniarnerat sapiitsuliornertut Bjørn Baytip nalilerpaa, tamannalu pissutigalugu ullumi akissarsisinneqarlutillu nersorniarneqarput.
- Annaassiniarnermi annaassiniartut tamarmik sapiitsuliorput, taamaattumillu nersorniarneqartariaqarlutik, Bjørn Bay oqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...