Nuuk Water Taxip angallataatini amerlivai
Nuuk Water Taxi piginneqatigiiffinngortinneqarpoq, angallataatillu amerlineqarlutik.
Nuummi umiatsiaq sungaartoq imaani taxitut angallassisoq siulleq ukiut pingasut matuma siornatigut aallartinneqarpoq. Maanna angallatit sungaartut, arfinilinnik ilaasoqarsinnaasut sisamaapput, Targa 37-ilu, inunnik aqqaneq-marlunnik ilaasoqarsinnaasoq aamma atorneqaleqqammerluni.
Pingaartumik misigisassarsiortitsinerit, soorlu arfernik takornariartitsineq, aalisariartitsineq arsarnernillu takornariartitsineq suliffeqarfimmut ingerlalluartitsipput, aammali Qooqqunut, Qoornumut Kapisilinnullu angallassisoqartarluni.
Amigaatigineqartoq
- Maluginiarsimavarput angallat anginerusoq sukkanerusorlu aamma amigaatigineqartoq, piginnittoq pisortaasorlu Anders Lykke Laursen tusagassiutinut nalunaarummini allappoq, nangillunilu:
- Maanna alloriarniarluta aalajangerpugut pitsaasumik sullissinissaq pisariaqartitsinerullu naammassineqarnissaa qulakkeerniarlugu. Taamaattumik suliffeqarfik piginneqatigiiffinngortipparput, taamaasiornitsigullu ataatsimoorluta suliffeqarfik inerisarsinnaasimavarput angallatigullu Targa 37-imik, aqqaneq-marlunnik ilaasoqarsinnaasumik, ilasinnaasimallugit. Angallat Nuummut tikereerpoq, angallassisalereerlunilu.
Siulersuisut
Siulersuisunngortut ukuupput:
Espen Andersen (siulittaasoq), taanna Ilulissat Water Taximik pilersitseqqaartuuvoq. Taanna takornarialerinerup iluani aallarnisaasutut misilittagaqarluarpoq Kalaallit Nunaannilu takornariartunut nioqqutinik inerisaanermik immikkut suliaqartareerluni. Maanna Greenland Shoreximi pisortaavoq.
Ingerlatsinermi pisortaq Topas Explorer Groupimeersoq, Jørgen Nielsen. Taassuma Kalaallit Nunaanni takornariaqarnerup inerisarnissaanik sulissutiginnippoq, taamatullu ukiuni 20-ni kingullerni suliaqareerluni.
Ingerlatsinermi pisortaq Per Steen Larsen, Pisiffik A/S-imeersoq.
Suliffeqarfik ullumikkut arfineq-marlunnik sulisoqarpoq, angallatilli amerlineratigut Anders Lykke Laursenip naatsorsuutigaa siunissami amerlanerusunik sulisoqalernissaq.
Ukioriartoraluartoq Nuup kangerluani angallassisarnerit ingerlatiinnarneqassapput.
Ukiukkut angallassinerit
- Ukioq kaajallallugu angallassisalerpugut, ukioq mannalu ukiuunerani angallassisarnitsinni Targat pingasut initallit issiaveqartullu angallatigissavagut, initaani kiassaateqarpoq anartarfeqarlunilu. Piumaneqarluarnerlu nalimmassarfiginiarlugu angallatit amerlinissaanut ukiunut tullernut pilersaarusioreerpugut, pisortaq ilisimatitsivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...