Nuuk Water Taxi: 100.000 koruunit sinnerlugit sapaatip akunnerata naanerani annaavavut

Inniminnikkanik taamaatitsiinnartorpassuit aamma takornariat sukkasuupilussuarmik nunamiit aallarartut, nutaanillu takkuttoqartarani. Kalaallit Nunaanni takornariartitsisarfiit mikinerit marluk coronamik ajornartorsiuteqarneq taamatut misigisimavaat.

- Aningaasarneq qiviassagaanni, taava eqqugaaqqavugut. Nunanit allamiut kaaviiaartitsisarnerat amigaatigaarput. Inuussutissat, tassalu aningaasat avataaneersut nungulluinnarput. Sapaatip akunnerini tulliuttuni pingasuni nunanit allanit tikeraartussaqanngilagut, Anders Lykke Laursen oqaluttuarpoq.

Taanna Nuuk Water Taximi, takornarianik najukkamilu najugalinnik Nuup eqqaani imaatigut angallassisarfimmi pisortaavoq, sapaatillu akunnerata naanerinnaanni taamaatitsiinnartunik arlalinnik nalunaarfigineqarsimavoq:

- Martsip qaammataani angallanneqarnissamut inniminniisimasut tallimat ippassaq taamaatitsiinnarput. Inuit taakku Kalaallit Nunaannukarsinnaajunnaarsimallutik taamaatitsiinnarsimapput. Taamaalilluta kaaviiaartitsinitsinni 100.000 koruunit missaannik annaasaqarpugut, pisortaq oqarpoq.

Laursen: Inunnik taamak amerlatigisunik pisariaqartitsinngilagut

Anders Lykke Laursenip oqaluttuaraa, ingerlatseqatigiiffik suli najukkameersunik angallassassarpassuaqartoq, ajornartorsiortoqarnissaanullu piareersimalluartoq, kaaviiaartitassanilli amerlanerusunik annaasaqarnissaq annernassagatinnerarpaa:

- Suliffeqarfitta alliartortinneqarsinnaaneratigut eqqugaavugut. Angallataatitta tamarmik atorneqarnissaat immaqa pisariaqartissanngilarput, taamaammat sulisut ilaat nunamiiginnartariaqarput. Piffissami aalajangersimasumi sulisussanik atorfinitsitsinissarput immaqqa aamma pisariaqassanngilaq. Soraarsitsinertut taarusunngilara, suliffissaqartitsinngitsutulli taarusullugu.

Ilulissani IceCap Toursimik piginnittoq Arne Niemanna aamma taamatut nalunaaruteqarpoq. Taassuma oqaluttuaraa, Ilulissani takornarianik imaatigut suli angallassiffissanngunngikkaluartoq, angallanneqarnissamut inniminnikkanik taamaatitsiinnarnissamut periarfissaqartoqarnersoq pillugu arlalinnit saaffigineqarsimalluni.

IceCap Toursimi sulisut sisamat angerlartinneqartut

Arne Niemann imaatigut angallassisarnernermi saniatigut Caféuteqarlunilu ininik attartortitsisarpoq, taakuninngalu niueruteqarneq annertuumik eqqugaasimalluni:

- Ullaap tungaani sulisunit 14-iusunit sisamat angerlartippakka, taamaaliortariaqarama. Sapaatip akunnerata ingerlanerani susoqanngippat, angerlatinneqartut amerlanerulersinnaapput. Tamanna kingunerluttussaavoq, Arne Niemann oqarpoq.

Takornariat amerlanersaasa, taamalu aamma kaaviiaartitassat Ilulissat qimassimavaat, takornariartitsisartoq oqaluttuarpoq.

Arne Niemannimit ernummatigineqarpoq, kaaviaartitassanik annaasaqarnissaq eqqarsaatigalugu påskep akisunaarneqarsinnaanera:

- Nalinginnaasumik Påskemi suna tamarmi ulikkaaqqasarpoq, tassungalu atatillugu inniminnikkanik taamaatitsiinnartorpassuaqareerpoq, tamanna annaasaqarfigingaatsiarsinnaavarput.

Namminersorlutik Oqartussat ikiuinissaat neriuutigineqartoq

Anders Lykke Laursen Nuummi Nuuk Water Taximik piginnittoq aamma Arne Niemann IceCap Toursimik piginnittoq Namminersorlutik Oqartussanit ikiorsiisoqarnissaanik neriuuteqarput, soorlu Danmarkimi ministeriuneq Mette Frederiksenip suliffeqarfinnut ikiorsiissuteqartoqassasoq sapaatiummat nalunaarutigigaa.

- Neriuutigaara Namminersorlutik Oqartussanit ikiorserneqassalluta. Ikiorserneqarnitsigut sulisut aasamut pisariaqarluinnartitassavut sulisoriinnarsinnaassavavut, Arne Niemann oqarpoq.

Sulisullumi sulisoriinnarneqarnissaat Anders Lykke Laursenip aamma ukkataraa:

-Neriuutigaara, Danmarkimisut sulisut aningaasarsiassaannut tapiissuteqartoqarluni arlaatigut ikiorserneqassasugut, virusimi tuniluukkunnaarpat sulisutta suliffissaqaannarnissaat taamaalilluta angussagatsigu. Pingaarnertut siunertaraaram sulisumma illersorneqarnissaat.