Nuuk toqusut timaannik ikuallaasarfeqalissaaq

Kommuneqarfik Sermersuumi kommunalbestyrelse pingasunngormat ataatsimiinnerminni aalajangerpaat nunatsinni illoqarfinni pingaarnersaat toqusut timaannik ikuallaasarfeqalissasoq.

Ilaqutaasoq Nuummi najugaqartoq toquppat Nuummi ilisaannginnermini timaanik ikuallaasalernissaq piviusunngoratarsinnaavoq. Demokraatineersoq Randi Vestergaard Evaldsen kommunalbestyrelsemi ataatsimiinnermi Nuummi toqusut timaannik ikuallaasarfeqalernissaq pillugu siunnersuuteqarpoq.

Siunnersuuteqartuusup toqusut timaannik ikuallaasarfeqalernissamut tunngavilersuutigaa siunissami iliveqarfinni inissaasuasoqalernissaa pinngitsoortinneqarsinnaammat.

- Nalunngilara iliveqarfiit nunaminertallu tungaatigut unammillernartorpassuaqartoq. Toqusut timaannik ikuallaasinnaanngussagutta ajornartorsiutit arlallit iliuuseqarfigisinnaanngussavagut , Randi Vestergaard Evaldsen siunnersuummut tunngavilersuilluni allappoq.

Siunnersuut akuerineqarpoq

Siunnersuuteqartup erseqqissarpaa nunatsinni iliveqarfiit allilerneqartarneri aserfallatsaaliorneqartarnerilu akisusut. Ilisilinnginnermilu timi toqungasoq ikuallanneqarsinnaalissappat, tamanna aningaasaqarnikkut inissaqartitsiniarnikkullu iluaqutaasussaavoq.

Randi Vestergaard Evaldsen Sermitsiaq.AG-mut ilisimatitsivoq kommunalbestyrelsemi ilaasortat tamakkerlugit siunnersuummut akuersaarsimasut.

Alloriarneq tulleq tassaalerpoq pilersaarusiornissaq pilersitsinissarlu. Pilersitsinissamulli suli piffissaliussisoqanngilaq.

- Nalunngilarput Naalakkersuisut nunatsinni toqusut timaannik ikuallaasarfeqalernissamut maanna misissuisut. Nalunngilarpulli tamanna aamma sivisusinnaasoq. Taamaammat aalajangerpugut kommunimi nammineq qanoq iliuuseqarniarluta, Randi Vestergaard Evaldsen Sermitsiaq.AG-mut oqarpoq.

Taassuma ilanngullugu erseqqissarpaa inunngortunik toqusunillu nalunaaruteqartarneq, ilisinerit iliveqarfiillu pillugit Inatsisartut Inatsisaanni kommuni toqusut timaannik ikuallaasarfiliornissamut pisinnaatinneqareersoq.

Kommuneqarfik Sermersuumi kommunalbestyrelsemi ilaasortat tamarmik siunnersuut akuersissutigaat.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS