Nuuk suli matoqqaannarallassaaq
Nuummiit najukkanut inoqarfiusunut allanut angalasarnerit inerteqqutaanerat aprilip 30-ata tungaanut sivitsorneqarpoq.
Nuummiit najukkanut inoqarfiusunut allanut angalasinnaaneq aprilip 30-ata tungaanut suli inerteqqutaagallarpoq.
Tunillaassortunik Nappaalanersuaqarneranut Ataatsimiititaliarsuup siulittaasua, Politimester Bjørn Tegner Bay tusagassiutinut taama nalunaaruteqarpoq.
Tunillaassortunik Nappaalanersuaqarneranut Ataatsimiititaliarsuup martsip qiteqqunnerani inassuteqarpoq Nuummiit, Nuussuarmiit aamma Qinngorpumiit, illoqarfinnut allanut angalasoqassanngitsoq. Inassuteqarneq aprilip 8-ta tungaanut killeqarsimagaluartoq, maanna aprilip 30-ata tungaanut sivitsorneqarpoq.
- Inassuteqarnermi pineqarput angallataasinnaasut tamarmik, immakkut nunakkut
silaannakkullu, illoqarfimmiit Nuummiit, taamaattoq inassuteqarneq inunnut atuunnani
pisariaqarluinnaqqissaartumik aallartariaqartunut, soorlu inuit napparsimallutik
perulunnertik pissutigalugu aallarunneqartariaqartunut imaluunniit inunnut inuiaqatigiinni
pingaaruteqarluinnartumik suliaqarnerminnut atatillugu aallartariaqartunut, politimester Bjørn Tegner Bay nalunaaruteqarluni ilisimatitsivoq.
Aalisarneq pineqanngilaq
Inoqarfinnut allanut angalasoqannginnissaanik inassuteqartoqaraluartoq, taamaattoq aalisariarnerit piniariarnerillu suli ingerlanneqarsinnaapput. Inassuteqaammi piumasaqaatituaavoq aallartut inoqarfinnut allanut tikigatik, Nuummut utertarnissaat.
Nuummi coronavirusimik tunillatsissimasut aqqaniliupput, taakkunannga qulit peqqissisimasut ullumi nalunaarutigineqarpoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...