Nuuk Snow Festival ullumi aallartippoq
Nuummi Snow Festivalimut apummik ilusilersuisussatut peqataaniarlutik nalunaarsimasut eqimattat arfineq-pingasuupput. Ullumi sisamanngornermi ilusilersuinerit aallartipput, sapaatiuppallu ajugaasut nalunaarutigineqassapput.
Nuummi Nuutoqqami apummik ilusilersuinermi peqataasussat isiginnaariartullu sisamanngornermi ullaakkut nalunaaqutaq 10.00, Nuuk Snow Festival aallartimmat peqataapput. Sapaatiuppat 7. marts tungaanut apummik ilusilersuisoqassaaq, ajugaasullu sapaatiuppat ualikkut nalunaarutigineqassallutik.
Nuuk Snow Festivalimi aaqqissueqataasup oqaatigaa apummik ilusilersuinerup nalaani peqataasussat suliaqartullu katillugit 40-t missaanniittut.
- Eqimattat arfineq-pingasut ilusilersuinermi peqataasussat saniatigut kajumissutsiminnik aamma sulisoqarpugut, Maannguaq Rosing, aaqqissueqataasoq oqaluttuarpoq.
Qulliit atorlugit takutitsineq nipilersukkanillu tusarnaarneq
Apummik ilusilersuinerup saniatigut arfininngornermi unnukkut qulliit atorlugit takutitsisoqarumaarpoq nipilersukkanillu tusarnaartoqarsinnaassalluni.
Ajugaasut sapaatiuppat nalunaaqutaq 14.00 nalunaarutigineqassapput.
- Nuannaarutigaarput ukiut tamaasa kajumissutsiminnik suliaqartussanik soqutiginnittoqartaratta. Apummik ilusilersuinissap tungaanut piareersaaneq annertoorujussuusarpoq, ilusilersuisussanik aamma kajumissutsimik suliaqartut taama soqutiginnilluartarnerat nuannerpoq. Ukiullu tamaasa iluatsittumik naammassisarnerata takutippaa suliagut akilertartut, Maannguaq Rosing oqarpoq naggasiillunilu:
- Neriuppunga ukioq manna ataatsimoorneq nuannaaqatigiinnerlu aamma misigeqqissagigut.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...