Nuuk Snow Fest 2023-mi ingerlanneqaqqissaaq
Nuummi aputeqarpianngikkaluarpoq. Upernaamulli apummik ilusilersuilluni unammisitsinissamut piareersaatit maanna aallartinneqareerput.
Nuummi juullip ukiutoqqallu akornanni aputeqarpianngikkaluarpoq. Nuuk Snow Festimulli piareersaatit maanna aallartinneqareerput. Nittaalernissaami aaqqissuisunit utaqqiinnarneqarsinnaanngilaq apummik ilusilersuilluni unammisitsineq ullunik sisamanik sivisussuseqartussap aaqqissuunnissaanut.
Nuuk Snow Fest 2023 ulluni 2.-5. marts 2023 ingerlanneqassaaq.
Aaqqissuisut taama nalunaaruteqarput.
- Nuuk Snow Fest ilaqutariit ullukkut nuannisarnissaannut periarfissatsialaavoq. Unnukkut festivalerfik naapiffissatsialanngortarpoq, qullernik takutitsisoqartassaaq aamma ikinngutigiit naapeqatigiittarfigissavaat tusarnaartitsisunut tusarnaariarnikkut. Neriuppugut ukioq kingullertut iluatsilluassasoq, maannali silaginnerulaaginnarluni, aaqqissuisoq Alberte Parnuuna oqarpoq.
Kajumissutsimik suleqataasussat pisariaqartinneqarput
Aaqqissuisut ilisimatitsipput unamminermi peqataaneq akeqanngitsoq. Innuttaasulli suliami peqataarusuttut, unammeqataarusunngitsulli aaqqissuisuussami kajumissutsiminnik aamma sulisinnaapput.
- Ikiuisinnaasut tamaasa pisariaqartippavut. Annertusinnaavoq annikitsuusinnaallunilu. Assersuutigalugu kialaarfimmi aqutsisuusoqarsinnaavoq, tassani peqataasunut aamma namminneq piumassutsiminnik suliaqartunut kaffinik tiimillu piareersimasoqarnissaa isumagineqartarpoq. Content creatoritulluunniit, taassuma nittartakkatsinnut assinik videonillu ikkussuineq isumagisassavaa, Alberte Parnuuna nassuiaavoq.
Nuuk Snow Fest 2023-mi pisussat februarimi saqqummiunneqassapput.
