Nuuk nutaamik qimarnguittaassaaq
Kommuneqarfik Sermersuumi isumaginninnermut ingerlatsivik qimarnguimmut nutaamut pilersaarummik piareersimatitsipput, tassani arnat meeraqartut katsorsartinnerminni najugaqarsinnaassapput.
Angerlarsimaffimmi nakuusertoqartarnera pillugu ullumi Nuummi ataatsimiittoqarnerani qimarguimmut pilersaarut saqqummiunneqarpoq, tassani Meeqqanut Ilaqutariinnullu Ingerlatsivimmi pisortap, Martha Lund Olsenip, illoqarfimmi qimarnguimmik amigaateqartoqarnera nassuerutigaa.
Isumaginninnermut naalakkersuisoq, Martha Abelsen, nunatsinni kommuninit tallimanit aallartitat, Isumaginninnermut Aqutsisoqarfik, kommunalbestyrelsi, Illernit aamma Mælkebøtten ataatsimiinnermut peqataapput.
Nuuk 18.000-nik innuttaasoqartoq ataatsimik qimarngueqarpoq,tassani ilaqutariinnut sisamanut inissaqarpoq. Tamannalu naassaanngitsumik utaqqisorpassuaqalerneranik pilersitsivoq, assersuutigalugu novembarimi aamma decembarimi qimarnguimmut inissinniartut utaqqisorpassuupput.
- Arnat uiminnit imaluunniit aappaminnit nakuusertumit qimaasut tamaasa tigusinnaasimanngilagut. Arnallu taakku aggertartut sivikitsuinnarmik inisimariarlutik ingerlaqqittartut maluginiartarparput. Tamanna inissakinnermik pissuteqarunarpoq, Marthan Lund Olsen, Sermitsiaq.AG-mut taama oqarpoq.
Illernit isumassarsiorfigineqartoq
Qimarnguimmi nutaami inissiat arfiniliullutilluunnit arfineq-pingasuussapput. Qimarnguit aasaru ammarnissaa Kommuneqarfik Sermersuup naatsorsuutigaa, inissisimaffissaali suli inissivinneqanngilaq, kisianni illoqarfiup qeqqani inissinnissaa isumaqatiginninniutigineqaleruttorpoq. Qimarnguimmi nutaami ininik immikkoortunik arnanut meeraannullu katsorsaaarfinnik pilersitsisoqassaaq, qimarguik taamaalilluni aamma ilaqutariit tassaniinneranni katsorsaanermik neqerooruteqrtarniassammat.
- Qimarnguik aallaqqaammut Nuummi innuttaasunuinnaq atorneqassaaq, kisianni Paamiuni aamma Tasiilami pisariaqartitsineq takujumaarparput, siunissamilu immaqa taakkununnga neqerooruteqarsinnaalluta.
Martha Lund Olsen nuna tamakkerlugu qimarnguimmit katsorsaavimmit Illerninit isumassarsiorsimavoq, tassani inissiat sisamaapput arnanut meeraannullu atorneqarsinnaasut. Arnat meeraallu tassaniinnerminni katsorsarneqarnissamut neqeroorfigineqartarput.
- Illernit periusaat assigalugu pilersitserusuppugut, katsorsaavillu qanimut suleqatigisinnaanissaa neriuutigaarput, taakkulu misilittagaat ilikkagaqarfigisinnaallugit, Martha Lund Olsen, Sermitsiaq.AG-mut oqarpoq.
Nuummi qimarnguik 2017-ip ingerlanerani arnat 31 nakuuserfigineqartartut meeqqallu 37-it najugaqarfigisimavaat.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...