Nuuk
Nuuk: Mobil tigumiarlugu biilertut politiit nakkutigaat
Aqqusinermut angallanermut allaffeqarfimmik Nuummi politiit ammaapput tassaanniillu 8.000 koruunit naliginut akiligassiinerit pipput nalunaaquttap akunnerisa arlaqanngitsut iluanni
Nuummi politiit biilimik ingerlatitsisut mobilit tigumiaannarlugit oqaluttut nakkutigeqqissaalerpaat. Tamanna pivoq aqqusinermi angallanermi allaffeqarfimmik ammaasoqareersoq taannalu pilersinneqarpoq aqqusinermi angallannermut isumannaannerulernissaa anguniarlugu. Kørekortimik arsaagaasimallutik biilertut aamma nakkutigeqqissaarneqalerput.
Politiit aqqusinermi angallanermut allaffeqarfianeersut ullut pingasut kingulliit aqqusinerni nakkutilliinerminni mobilimik tigumiarlutik oqaluutigalutik biilertut nakkutigeqqissaarsimavaat.
Qaammammusiatut akiligassiineq
- Akunnerit arlaqanngitsut aqqusinermi angallannermut allaffeqarfimmeersut angalaarnerminni 8.000 koruunit naligannut akiligassiipput, Nuummi politeeq Eigil Lyberth oqarpoq.
Mobili tigumiarlugu oqaluutigaluni biilerluni naammattoortikkaanni 500 koruunimik akiligassitsittoqartarpoq.
Kørekortimillu arsaagaasimanerup nalaani biilernermi annertuumik akiliisitaasoqarsinnaavoq.
Siullerpaamik kørekorteqarani biilernermi naammattoorneqarnermi 2.000 koruuninik akiliisitaasoqartarpoq. Akiligassarlu 4.000 koruuninut qaffattarpoq tullianik taamatut unitsitaanermi. Pingajussaannik taamatut unitsitaanermi qaammammusiat naligannut akiliisitaasoqartarpoq. Assersuutigalugu 350.000 koruuninik ukiumut akissarsiaqaraanni 20.200 koruuninik akiliisitaasoqartartoq, politiit nalunaarput.