Nuuk Marathon: Marathon kisimi ingerlanneqassaaq
Nuuk Marathon ukioq manna annikinnerussaaq, peqataasut marathon tamakkiisoq kisiat ingerlassinnaassavaat - tamanna pissaaq coronamut atatillugu malittarisassat eqqarsaatigalugit.
Ukioq manna Nuuk Marathon aggustusip arfineq-pingajuanni ullaakkut qulingiluanut Katuamit aallartinneqassaaq. Kim Godtfredsen Sermitsiaq.AG-mut ilisimatitsivoq.
Arpattartut klubbiat NAAPE arpannissamik aaqqissuisuuvoq.
Ukiuni allani pisartut assigalugit. Qinngorput angusarlugu 21 kilometerit marloriarlugit arpaffigineqassapput.
Ukioq mannalu marathon tamakkiisoq 42.195 kilometeri kisimi arpaffigineqarsinnaavoq.
- Marathon kisimi arpaffigineqassaaq, Covid-19-imut tunngatillugu malittarisassat inassuteqaatillu pissutigalugit.
- Tamatuma erseqqissaatigineqarnissaa nalunaarutigineqarnissaalu pingaaruteqarpoq, Nuuk Marathonimi arpattartut amerlanerit halvmarathonik arpattarmata, Kim Godtfredsen ilisimatitsivoq.
Amerlanerpaamik 100-t peqataasinnaasut
Ungasissutsit arpaffiusinnaasutut qinigassat amigaatigineqarnerat pissutigalugu, Kim Godtfredsenip naatsorsuutigaa ilaasussat killeqassasut, aamma amerlanerpaamik 100-t peqataasinnaapput. Siorna inuit 86-it arpaqataapput.
Nunarsuarmi tamarmi marathonimik arpanissarpassuit, coronap ajornartorsiortitsinera pissutigalugu taamaatiinnarneqarsimapput. Ilaatigut aamma Københavnimi Berlinimilu nuannarineqartaqisuni arpannissat taamaatinnarneqarsimapput.