Umiatsialiviit
Nuuk januaarip qaammataani nutaamik umiatsialivittaassaaq
Pingajussaanik iluatsittarpoq. Mike Høeghip oqaaseq taanna atorsinnaavaa. Pingasoriarlunimi qinnuteqartareerluni Nuup illoqarfittut ilaani Qinngorpumi kiisami umiatsialivimmik pilersitsisinnaanngorpoq.
Umiatsialivik siulleq januaarimi piareerneqarnissaa Mike Høeghip naatsorsuutigaa, pilersinneqannginneranilu umiatsialivimmiittut umiatsiat tamarmik peerneqaqqaassapput. Umiatsiallu peerneqarnissaat pillugit piginnittut nassuiaateqarfigalugit kommuni allagarsiisimavoq.
Januaarimi aallatinniartoq
- Januaarip aallartinnerani umiatsialivik siulleq imaanut ilissavarput, Mike Høegh, Masik-mi piginnittoq, Sermitsiaq.AG-mut oqarpoq.
Umiatsilivissamik apeqqutilliinerit naapertorlugit umiatsialiviit pilersinneqassapput. Umiatsialiviit katillugu 80 meterinik takissusillit pingasut sisamallu akornanniinnissat, Mike Høeghip naatsorsuutigaa.
- Ukioq kaajallallugu imaanissinnaasunik saviminernik umiatsialivinnik pilersitsissaagut. Umiatsialivinnilu kallerup inneranik atuiffiusinnaaqqullugu kallerup inneranut atassuteqalersinnaanissaq aammattaaq siunertaavoq. Soorlu Europami umiatsialivinni nalunngisavut, Mike Høegh oqarpoq.
Nuuk Oil-i umiatsialivissap eqqaani pioreersoq ingerlatsisuussasoq, siunertaavoq. Taanna ullut taamasa ammasassaaq.
Toqqorsivik
Umiatsiliviit atortuinut teknikkimullu atortunut toqqorsivigineqarsinnaasumik taanna illuliorluni aallartereersimavoq.
- Sulisoqarpunga ukiaanerani suliassaaleqisunik. Sulisut atorluarumallugit illutassaata toqqavissaa suliaralugu aallartereersimavarput, Mike Høegh nassuiaavoq.
Umiatsialiviup atornera illoqarfimmi umiatsialivinni akigitinneqartut assigiumaarai, taanna paasissutissiivoq. Inissamik inniminniillutik allatsissimasut arlaqalereersimapput. Nuuk Oil-p suliassarilerumaagaanut qarasaasiatigut atortut suli amigaatigineqarput.
Pilerinartoq
Sanarfinermut Avatagiisimullu Ataatsimiitami siulitaasup, Malene Lyngep (IA) umiatsialivittaassaq pillugu ima oqarpoq:
- Sumiiffiup ineriartortinneqalernera qilanaarutigisimavarput. Umiatsialivittaaq illoqarfiup ilaani najugaqartunut angalaartartunillu pilerigineqarnissaa ilimagaara, Malene Lynge, Sermitsiaq.AG-mut oqarpoq.