Nuuk innaallagiaaruteqqippoq

Nuummi illoqarfiup immikkortui tamarmik innaallagiaaruteqqipput. Innaallagiamut pilersuineq kipivoq nal. 9.45 missaani, Utoqqarmiut Kangerluarsunnguaniit innaallagissap aqqutaani attuuttoorneq pissutigalugu.

Nuummi innaallagiamik pilersuineq nalunaaqutaq 9.45 kipisooqqippoq.

Nukissiorfiit Facebookiminni ilisimatitsipput Utoqqarmiut Kangerluarsunnguani innaallagissap aqqutaani attuuttoorneq pissutigalugu attaviit akornusersimasut.

- Nukissiorfiit erngup nukiliorfiata piaartumik aallarteqqinnissaa sulissutigaa, sarfaqaleqqinnissaq qulakkeerumallugu, Nukissiorfiit allapput nutaarsiassaqassappallu piaartumik ilisimatitsissallutik.

Nukissiorfiit ullaaq manna ilisimatitsipput Nuummi innaallagiaaruttoorneq sumik peqquteqarsimanersoq paasisimallugu.

- Ullaaq manna nuummi nussuarmilu sarfaarunnerup peqqutaa paasivarput. Transformareqarfiup ilaa kissattoorsimavoq, kissattoornerminilu sarfaq qamissimalluni. Transformareqarfik maanna nillarsereerpoq ikeqqikkiartoqqillunilu. Sarfamik attaveqaatit tamarmik ikeqqqissinnaanngungajalerput. Nuummi Utoqqarmiut Kangerluarsunnguani erngup nukinganik sarfalersorneq ippassarli ingerlannarpoq.

Taamatulli aaqqiineq utaqqiisaarutaagallarpoq.

Utoqqarmiut Kangerluarsunnguaniittoq ajutooqqittoq

Kalaallit Nunaata Politiivi Facebookiminni ilisimatitsipput Utoqqarmiut Kangerluarsunnguani erngup nukiganik nukissiuut ajutooqqissimasoq:

- Nukissiorfiit ilisimatitsipput, Utoqqarmiut Kangerluarsunnguani innaallagissiorfik nal. 10.00-ip missaani sarfaaruteqqittoq, Nuummilu tamarmi innaallagissap sarfaarunneranut tamanna pissutaalluni, politiit allapput.

Suli ilisimaneqanngilaq Nuuk qaqugu innaallagiaqaleqqissanersoq.

- Nukissiorfiit innaallagissamut ajornartoornermi sarfaliuutaat Nuummiittoq atulersinneqarpoq, taamaalilluni naatsorsuutigineqarluni illoqarfiup ilaani ataavartumik innaallagiaqaqqilersinnaassasut. Maannakkumuungallartorlu erseqqissumik oqaatigisinnaanngilarput, innuttaasut qaqugu innaallagiaqaqqilissanersut. Nukissiorfiit ilisimatitsipput, ipparsartuut ajornartoornermi sarfaliuutip attavilerneqarneratut sivisutigisumik utaqqeqqissanngitsut.

Nuummi pingasunngornermi anorersuarujussuarnissaanik ilimasaarisoqarpoq. Anorersuarujussuarnermi innaallagiaaruttoqarsinnaaneranut tunngatillugu politiit innuttaasunut kaammattuipput piareersassasut.

Powered by Labrador CMS