Nuuk Imiup kaaviiaartitani annertusigai
Kaaviiaartitat 2,8 procentimik qaffariaateqarput ukiumullu inernerusoq siornarnit 5 milliuunit koruuninik annertunerulluni, Nuuk Imeq pingasunngornermi ileqquusumik ataatsimeersuareerluni ilisimatitsivoq.
2018-imi sodavandinik tunisineq 5,8 procentinik qaffariaateqarpoq, immiaaqqanillu tunisineq 0,6 procentiinnarnik appariarluni. Ukiumut kaaviiaartitat 199,4 milliuunit koruuniupput.
Nuuk Imeq ileqquusumik ataatsimeersuaqqammersoq, ukiumi 2018-imi naatsorsuutit pillugit saqqummiussiffigineqaqqammersoq, tusagassiutinut taama nalunaaruteqarpoq.
Ukiumi angusat 4,9 milliuunit koruuninik pitsanngoriarput akileraarutillu kingorna 32 milliuunit koruuniullutik. Angusat qaffariaataannut pissutaaneruvoq tunisaqarneruneq aserfallatsaaliuinermullu aningaasartuutit ikileriarnerat.
Ingerlatsivik 44-inik piffissaq tamaat sulisartunik sulisoqarpoq pisortat karsiinullu 53,5 milliuunit koruuninik tapiisimalluni.
Puut atorneqartut atuinnarneqassapput
- Nuuk Imeq suli isumaqarpoq maannakkut puut pillugit aaqqissuussineq – nunat tamat akornanni avatangiisinut uuttueriaatsit tamaasa tunngavigalugit pitsaasumik sunniuteqarneranik uppernarsarneqarsinnaasumik – allanik periuseqarsinnaanermut sanilliullugu avatangiisinut pitsaanerpaajusoq, aamma tamassuma suliffissaqartitsinermut inuiaqatigiillu aningaasaqarnerannut Kalaallit Nunaanni aaqqiissutinit pitsaanerpaajunera pissutigalugu, ingerlatsivik tusagassiutinut nalunaarummini erseqqissaavoq.
Puut 97,7 procentii 2018-imi utertinneqarsimapput.
Naalakkersuisut ataasinngormat ilisimatitsipput sodavandit immiaaqqallu nutaamik pooqalernissaat pillugu 2020-mi saqqummiussiniarlutik.
Kuupik Vandersee Kleist, Kommuneqarfik Sermersuumit toqqarneqarsimasoq, siulersuisuni siulittaasutut toqqarneqaqqippoq. Siulersuisuni ilaasortat sinneri tassaapput Carlsberg Breweries A/S sinnerlugu Jens Peter Philbert, Royal Unibrew A/S sinnerlugu Peter Roland aamma sulisartut sinniisai Frederik Lange Rasmussen Poul Stoibergilu.