Nuuk Imeq sinneqartooruteqarujussuaqqittoq
Maqitsisarfik Nuuk Imeq 2019-imi 31 millioner koruuninik sinneqartoorsmavoq, piginnittunullu 42 millioner koruuninik tunniussisimalluni.
Ingerlatseqatigiiffiup tusagassiorfinnut nalunaaruteqarnermi ilisimatitsissuitaam 2019-imi 31,1 millioner koruuninik sinneqartoortoqasimasoq – 2018-imut sanilliullugu 0,9 millioner koruuninik annikinnerusunik.
Naatsorsuutini takuneqarsinnaavoq siunnersuutigineqarsimasoq, iluanaarutit 42 millioner koruuniusut piginnittunut pingasunut tunniunneqassasut: Kommuneqarfik Sermersooq, Royal Unibrew aamma Carlsberg Breweries.
Ajornartorsiortoqanngersaaraluartoq iluanaarutit akuerineqarsimapput, siulersuisuni siulittaasoq Kuupik V. Kleist Sermitsiaq.AG-mut oqaluttuarpoq:
- Covid-19-imut atatillugu eqqarsaasersuuteqarsimavugut, siornali angusarineqartut agguaqatigiissillugu angusarineqartartut annertoqqatigiinnangajammagit, aamma kommunip karsiata aningaasat pisariaqartimmagit, aalajangersimavugut tunniussisoqarnissaanik inassuteqartoqassasoq, Kuupik V. Kleist oqarpoq.
Puut pillugit nalunaarutissaq pillugu nutaarsiassaqanngitsoq
Nuuk Imermi ukioq manna iluaaarutigineqartunit piginnittut pingasut 164 millioner koruuninik tunineqarsimapput.
Suliffeqarfik 2019-imi 44-nik sulisoqarpoq. Sodavandit tunineqarsimasut 2,1 procentimik qaffariarsimapput, immiaaqqalli 01, procentimik appariarsimallutik.
Puut pillugi nalunaarutip allanngortinneqarnissaanik eqqarsaasersuuteqarnermit Nuuk Imeq siusinnerusukkut sunnerneqarsimavoq. Nalunaarut utertitsisarnermi tunngaviuvoq, taamalu Nuuk Imiup ingerlatsinerata ilaanut pingaaruteqarluni.
Puut pillugi nalunaarut suli allanngortinneqanngilaq, siulersuisunilu siulittaasup ilisimatitsissutigaa, ingerlatseqatigiiffik politikkikkut suliamut tunngatillugu nutaamik tusartinneqarsimanngitsoq.
Aserfallatsaaliinerit annertuut ingerlanneqarsimasut
Ingerlatseqatigiiffik ukiumoortumik naatsorsuutit pillugit nalunaaruteqarnermi allappoq, tunisassiornermi atortut ilaat 2019-imi 2020-milu aserfallatsaaliorneqarsimasut, maannamullu naammaginartumik angusaqarallartoqasimasoq.
- Nuuk Imiup politikkikkut nalunaaruteqartoqaraluartoq puut pillugit nalunaarummik allannguisoqarniartoq, Nuuk Imiup suliffeqarfittut Kalaallit Nunaanni inuiaqatigiinnut suli pingaaruteqarnera upperaaa, ingerlatseqatigiiffik allappoq.
Kuupik V. Kleist siulersuisuni siulittaasutut Kommuneqarfik Sermersuumit toqqakkatut ingerlaannassaaq.