Nuuk Imeq annertuumik millioninik sinneqartooruteqarpoq
Nuuk Imermi naatsorsuutit Kommuneqarfik Sermersuumi aningaasaqarnermut ataatsimiititaliamit suliarineqassapput. Sinneqartoorutit tamarmiusut 52 mio. kr.-t piginnittunut agguaanneqassapput, kommuni 18,9 millionit koruuninik ingerlatseqatigiiffimmit pissarsissalluni.
Maqiterivik aamma sodavandinik tunisassiorfik Nuuk Imeq 2022-mi 52 millionit koruuninik sinneqartooruteqarpoq. Kaaviaartitat 213,7 mio. kr.-upput, tamannalu ukiup siulianut sanilliullugu 5 mio. kr.-nik appariarneruvoq.
Sinneqartoorutit piginnittunut iluanaarutigineqassapput, 52 mio. kr.-t iluanaarutitut agguaanneqassammata.
Ingerlatseqatigiiffiup naatsorsuutaanni tamanna atuarneqarsinnaavoq, taanna marlunngornermi Kommuneqarfik Sermersuumi aningaasaqarnermut ataatsimiititaliami suliarineqassaaq.
Kommuneqarfik Sermersuup aktiat 36,28 procentii katillugit 38 mio. kr.-t pigai. Danskit immiaaraliorfii marluk Carlsberg Breweries A/S aamma Royal Unibrew A/S immikkut aktianit 31,86 procentit pigaat.
Kommuneqarfik Sermersoq piginneqataassutsiminit iluanaarutinit 18,9 mio. kr.-nik pissarsivoq.
Nuuk Imermi naatsorsuutinit kisitsisit pingaarnerit (allaaserisaq tabelip ataani nanginneqarpoq):
Suliffeqarfiup nioqqutissaataani pingaarnerit imartussutsimut uuttortaraanni katillutik 7 procentinik appariarput. Immiaaqqanik tuniniaanermi 11 procentinik appariaateqarluni aamma sodavandinik tuniniaaneq 3 procentinik appariaateqarfiusoq.
Immiaaqqat tunisat appariarnerat ilaatigut ukiuunerani 2022-mi piffissap ilaani imigassanik aalakoornartulinnik tuniniaanermut inerteqquteqartoqarneranik pissuteqarpoq:
- Nioqquteqarnermut peqatigitillugu immiaaqqanik 700.000-t missaannut nioqquteqarnissamut annaasaqarluta, Nuuk Imiup missiliorpaa. Tamannali appariarneq 2022 immiaaqqat tunisaanerannik kisimi appariartitsisuunngilaq, ingerlatseqatigiiffik naatsorsuutini allappoq.
Akinik qaffaanernik allanik naatsorsuuteqartut
Kommunit arlallit 2022-p aallartinnerani imigassanik aalakoornartulinnik tuniniaaqqusiunnaarput, peqqinnissaqarfiup tatineqarnera pinngitsoortikkumallugu, piffissami tassani corona nunarsuaq tamakkerlugu suli tuniluuppoq, inerteqquteqarnerlu Nuuk Imermut sunniuteqarpoq.
Aningaasat naleerukkiartupileernerisa malitsigisaanik aamma Ukrainemi sorsuttoqarnera pissutigalugu niuerfimmi eqqissisimanngittoqarnerani aningaasartuutit qaffannera pissutigalugit 2022-mi akinik qaffaasoqarsimasoq, ingerlatseqatigiiffik ilisimatitsivoq. Nuuk Imeq 2023-mi akinik qaffaaqqinnissamik naatsorsuuteqarpoq.
2023-mi kaaviiaartitat 204 millionit koruunit missaanniittut tunuliaqutigalugit akileraannginnermi angusat 40-45 millionit koruuniunissaat naatsorsuutigineqarpoq.
2022-mi puiaasat atorneqartut 98,7 procentii utertinneqarsimasut nalunaarsorneqarpoq (2021-mi 98,2 procentit).
Sulisut attakkuminaatsut – siulittaasoq ingerlaqqissasoq
Nuuk Imeq ukiuni kingullerni oqallisaasarpoq, ingerlatseqatigiiffik puiaasat pillugit nalunaarut pissutigalugu kisermaassisuummat. Kingusinnerpaamik 1. januar 2024-mi nalunaarummik nutaamik atuutilertoqarnissaa, politikkikkut siumut nalunaarutigineqarnikuuvoq.
Siunissap nalunarnerani ingerlatseqatigiiffiup sulisuni attakkuminaatsippai, aningaasaliinerillu minnerpaaffimmiitinneqarput, naatsorsuutini tamanna atuarneqarsinnaavoq.
Aammattaaq aningaasaqarnermut ataatsimiititaliamit inassummi atuarneqarsinnaavoq, Kuupik V. Kleist siulittaasutut ingerlaqqissasoq inassutigineqartoq. Kommuneqarfik Sermersooq aktiat amerlanerpaartaannik piginnittuunngilaq, kisianni siulersuisuni siulittaasumik taasisinnaatitaavoq, taanna 120.000 kr.-nik akissarsiaqartinneqartarpoq.