golf
Nuuk Golf Klubimi hole-in-onertoq siulleq
Kalaallit Nunaanni golfertartut peqatigiiffianni siullersaalluni Apollo Jeremiassen hole-in-onertoq aggustip 29-ani
Nuuk Golf Klub ukiuni 14-ni atuutereersorlu siullerpaamik hole-in-onertoqarpoq, tassa ataasiaannarluni golfimi periarnermini arsaaraq siullersaalluni ikivaa, peqatigiiffiup siulittaasua Finn Hilmer nalunaarpoq.
- Golfertartoq KNR-imi tusagassiortoq Apollo Mathias Jeremiassen, kalaallini siullersaalluni aamma peqatigiiffimmi siullersaalluni hole-in-onerpoq, Finn Hilmer oqaluttuarpoq.
Apollo Jeremiassenip savalimmiormiu Magni Niclassen golfeqatigimmagu ataasiarluni periarnermini arsaaraq ikivaa tallimanngormat.
- Arsaaqqap silaannarmiinnera isigalugu, kiisalu ikinera misigisaq nuannersupilussuuvoq. Unamminerput pisortatigoortuunnginnera pissutaalluni Grønlandsbankenimit 10.000 koruuninnanngilanga ajoraluartumik, Apollo Mathias Jeremiassen oqaluttuarpoq.
- Nuuk Golf Klubip ukiuni 14-ni peqatigiiffioreerluni aatsaat siullerpaamik hole-in-onertoqarpoq, tamannalu Apollo Jeremiassenip tulluusimaarutigisinnaavaa, Finn Hilmer oqarpoq.
Golfertarfimmi pisariunerpaami misiliisimasoq Finn Hilmer oqarpoq.
- Golfillaqqinnerpaat iluatitsinerpaallu kisimik hole-in-onersinnaapput. Akissarsiutigalugu golfertartut qaqutikkut aamma taamatut angusaqartarput, Finn Hilmer oqarpoq.
Nuuk Golf Klubimi pisortatigoortumik unammisoqartillugu hole-in-onertoqarpat Grønlandsbankenimit akissarsititsisoqarumaartoq nalunaarutigineqarpoq.