Nuuk Centerip allilerneqarnissaa unitsinneqartoq
Suliniut milliardip affaata missaanik akeqassangatinneqarpoq. Ingerlatseqatigiiffik suliniuteqartoq maanna atorunnaartussanngorpoq.
Nuuk Centerip ullumikkut niuertarfinnit Namminersorlutillu Oqartussani naalakkersuisoqarfinnit arlalinnit atorneqartartup allilerneqarnissaa ukiuni arlalinni sulissutigineqarsimavoq.
Centerip allilerneqarnerani niuertarfiit, allaffiit najugaqarfiillu inissaqartinneqalertinnartussaagaluarput. Ingerlatseqatigiiffik Amerikamiut Nuummi konsulateqarfianit alliliiffimmi allaffeqalersinnaaneq pillugu saaffigineqarsimavoq.
Amerikamiut saaffiginnissutaat tigulluarneqarsimavoq, konsuleqarfiullu piumasaqaatai pisariartitaalu suliniutissatut siunnersuummut ilanngunneqarsimallutik.
Alliliinissamilli pilersaaruteqarneq maanna unitsinneqarsimavoq, Kommuneqarfik Sermersuumi kommunalpolitikkerinut ilisimatitsissummi atuarneqarsinnaavoq.
Aningaasaqarneq ataqatigiinngitsoq
Suliarinnittussarsiuussisoqarmat neqeroorutigineqartut akisuallaarnerat pissutigalugu suliniut aningaasatigut imminut ataqatigiikkunnaarsimavoq. Kommunip illoqarfimmik ineriartortitsinermut ingerlatseqatigiiffiutaani - Nuuk City Development A/S-imi (NCD) suliniummik ingerlatsisuusumi pisortaq taamatut oqaluttuarpoq:
- Suliniut qanoq akeqassanersoq naatsorsortarsimaqaarput, naatsorsuisarnerullu inernerivaa, alliliisoqarpat NCD-mut amigartooruteqartitsissasoq. Amigartoorutaasussat matussutissaqartinnginnatsigit suliniut unitsinniarlugu aalajangersimavugut, NCD-mi pisortaq Jens B. Frederiksen Sermitsiaq.AG-mut oqarpoq.
Naatsorsuisimanerit siulliit takutissimavaat Nuuk Centerimik alliliineq 280 millioner koruunit missaannik akeqassasoq. Tamatumali kingorna 460 millioner koruuninik akeqassasoq nalilerneqarsimavoq.
Akit appartinneqarsinnaanerat naatsorsuutigineqanngitsoq
Suliassaq upernaaq suliarinnittussarsiuunneqarpoq, neqeroorutilli tiguneqarsimasut akisuallaarlutik.
- Ukiuni aggersuni akikinnerulersinnaanera upperivallaanngilarput, Jens B. Frederiksen oqarpoq.
NCD Agerskov & Motzfeldt ApS-imik suleqateqarluni suliniummik ingerlatsisisimavoq. Suliffeqarfiit taakku marluullutik Byggekonsortiet Narsarsuaq I/S siunertamut atatillugu pilersissimavaat, taannalu maanna atorunnaartussanngorpoq.