Nuuk ajornartoornermi innaallagissiorfimmit marlunngornermi pilersorneqassaaq
Nuuk ajornartoornermi innaallagissiorfimmit marlunngornermi pilersorneqartussanngorpoq. Tamassumunnga pissutaavoq erngup nukiganik nukissiorfimmit innaallagissap aqqutaani ajoqusilaarsimanerit aaqqissuunneqartussanngormata. Nukissiorfiit nalunaarput tamanna ajornartorsiortitsinavianngitsoq.
Utoqqarmiut Kangerluarsunnguanit Nuummut innaallagissiorfiup aqqutaani akornutit annikitsut pingasut, qulimiguulimmik nakkutilliiartortoqarnerani ullumi paasineqarput.
Akornutit paasineqartut aqagu aaqqissuunneqartussanngorput, taamaammat ajornartoornermi innaallagissiorfimmit Nuuk marlunngornermi pilersorneqassasoq, Nukissiorfiit tusagassiorfinnut nalunaaruteqarput.
- Aaqqiinermi kingullermi akornutit maanna paasineqartut takuneqarsinnaasimanngillat. Akornutimmi sermimit annertuumik qallerneqarsimasimapput. Sermerli maanna aammat akornutaasut takuneqarsinnaalerput, kaanngavitsinnagillu iluarsaanneqartussanngorlutik, Nukissiorfiit nassuiaapput.
- Akornutit aqagu iluarsaanneqassapput, taamaattumik erngup nukiganik nukissiorfimmit pilersuineq kipigallarneqartussanngorpoq.
Nuuk ajornartoornermi innaallagissiorfimmit pilersorneqarallassaaq.
Ajornartoorfiunavianngitsoq
Nuummi novemberip naalernerani qulliit qamittoorput. Tassani erngup nukiganik nukissiorfimmiit pilersuinerup kipisoorutigineqarnera pissutaavoq.
Maannali taamaattoqassanngitsoq, Nukissiorfiit qulakkeerinnipput.
- Erngup nukiganik nukissiorfimmit pilersuinerup atorunnaarsikkallarnissaa pilersaarutaareerpoq, taamaammat Nukissiorfiup naatsorsuutiginngilaa tamanna illoqarfimmi ajornartorsiortitsilissasoq, Nukissiorfiit allapput.
Erngup nukiganik nukissiuummit pilersuinermut attaviit kipisoorsimasut iluarsaanneqarallarsimapput. Aasarulu inerlugit iluarsaanneqartussaallutik.
Taassuma tungaanut pilersuinermi aqqutit qulimiguulimmik ullut 14-ikkaarlugit nakkutilliiffigineqartassapput, anorersuareersimatillugulu aamma nakkutilliiartortoqartassalluni. Akornutissarsiarineqartut ajutoortoqarujussuartinnagu iluarsaanneqartarnissaat tassani siunertaasoq, Nukissiorfiit ilisimatitsipput.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...