- Nuugaatsiaq qimakkatsigu sakkortuumik qisuariartoqarpoq

Kalistat Lundip qanorpiaq sivisussusilimmik sulisimanerluni eqqaamarpiarsinnaanngilaa. Kisianni akunnerit 14-iusorai.

- Suliaq aallukkaanni piffissaq misigisimajunnaarneqartarpoq, taanna Sermitsiaq.AG-mut oqarpoq.

- Unnuap qaamasarnerani unnuaanersoq imaluunniit ulluunersoq nalulerpara. Sikorskymik qulimiguulimmik annaassiniummik Nuugaatsiamit qimagussortitsinermi timminermini akunnerit sakkortuut taama oqaatigai.

Ataqatigiissaarineq pisariaqartoq
Issittumi Sakkutooqarfiup aqutsisoqarfiani oqarasuaat sianermat, Kalistat Lund Kangerlussuarmi pigaartuuvoq: Uummannap eqqaani nunaqarfimmi ajunaarnersuaqarsimammat piareersartariaqarpoq.

Taamaattorli silaannarmut pinissaanut piffissaq sivisulaartoq ingerlavoq. Suliaq annertoorujussuaq pineqarpoq, aallaqqaataaniillu suna tamarmi pilersaarusioqqissaarneqarnissaa pisariaqarpoq.

Politiineersut, kommunimi upalungaarsimasut aamma peqqinnissaqarfimmi sulisut ajunaarnersuaqarfiusumut angallanneqassapput.

Kangerlussuarmit politeeq ataaseq ilaavoq. Tassanngaanniit Sisimiuni, Aasianni aamma Ilulissani sulisunik aallerput, tassanilu sarfaliuummik aamma ikisisoqarpoq.

Takusaq ajortorujussuaq
Nuugaatsiamut tikikkamik qulimiguullit Bell 212-t marluusut aappaa naapippaat, taanna qimagussortitsilluni ulappusereernikuusoq.

Ataasiarlutik qulaallutik timmipput, Kalistat Lundip nunaqarfik aserorsimaqisoq takuaa. Illut imaanit amuneqarsimasut siulliullugit takuai.

- Takusaq ajortorujussuuvoq. Nunaqarfik sekundialuit ingerlanerini piuneerunneqarsimasoq eqqarsarpunga, taanna oqarpoq.

Qulimiguulik mimmat meeqqat angajoqqaatillu qaqqamit ammut arpapput, amerlasuut masapput, tamarmillu tupaqqallutik. Ingerlaannaq Skikorskymut ingipput.

- Qulimiguulimmut ikinerminni soorlu toqqissisut, Kalistat Lund oqarpoq.

- Assut tupaqqapput, amerlasuut pigisatik tamaasa annaasimavaat, inuillu sisamat ajunaarsimagunarput.

Qisuariarneq sakkortooq
Annaassiniartut tassaniiginnarput, Kalistat Lundilu Uummannap tungaanut timmisussaalluni paasitinneqarpoq.

- Qulimiguulik qangattartikkippullu sakkortuumik qisuariartoqarpoq. Inuit nunaqarfimminnik qimassisariaqartut sakkortuumik misigissuseqartut ersarippoq, Kalistat Lund oqarpoq.

Qimagussorneqartut Uummannami politiinit peqqinnissaqarfimmeersuniillu aaneqarput.

Tamatuma kingorna politiit marluk ilagalugit utimut aallarput: Umiatsiat marluk maqaasineqarput.

Kingusinnerusukkut qasuneq takkuppoq
Sivisulaamik ujaasinerup kingorna umiatsianut attavinipput: Tamarmik ajunngillat.

Tassanngaanniik Nuugaatsiamukarput. Nunaqarfimmit qimagussortitsiffiusumit annaassiniartut marloriarlugit uterneqarput. Politiit tallimaannaat tassaniipput.

Tassanngaanniit Uummannamit Ilulissaliarpoq, Kalistat Lund tassani paarlanneqarpoq.

- Ilulissanut aatsaat tikikkatta qasunera malugilerpara, taanna oqarpoq.

Kalistat Lund ataasinngornermi suli piareersimalluni Ilulissaniippoq, marlunngornermilu unnukkut kingusissukkut Nuummut angerlassaaq.