ulorianartoq
Nuugaatsiami aamma Illorsuarni ulorianartorsiorneq suli misissorneqarpoq
Nuugaatsiami aamma Illorsuarni Kalaallit Nunaanni Upalungaarsimanermut Ataatsimiititaliap isumannaallisaanermut pissutsit suli sulissutigai.
Tassaarsuarmik Nuugaatsiamut eqquisup eqqaani nunap sisoorsinnaaneranut suli ulorianartorsiortoqarpoq.
Kisianni aamma piffinni allani sisoortoqarnissaanik ulorianartoqarpoq.
Kalaallit Nunaanni Upalungaarsimanermut Ataatsimiititaliaq tusagassiuutinut nalunaarummi taama naqissusiivoq.
- Immikkut ilisimasallit naliliinerat malillugu pingaartumik juunip ulluisa 17-ianni sisoorfiusup kitaani, 1 km-inik ungasissusilimmi, aammalu qajannarunnaarfiusinnaasunit allanit qaqqap sisoorluni tassaarsuarmik pilersitsisinnaanissaanik suli ulorianartorsiortoqarpoq, tusagassiuutinut nalunaarummi allaqqavoq.
Piffimmi qaqqat allat ulorianarsinnaanerisa qularnaateqannginnera pissutigalugu, nunanit tamalaanit ilisimasallit aamma GEUS-ip sapaatip-akunnerata siulianili ulorianartorsiorfiusumi qaartitsisoqannginnissaa innersuutigaat.
- Qaqqap ilaanik piigaqarluni sumiiffimmi allani annertunerusumik ulorianartorsiortitsilertoqarsinnaavoq. Taamaalilluta ajoreersoq suli ajornerulersissinnaavarput, Flemming Getreuer Christiansen, GEUS-imeersoq Sermitsiaq.AG-mut taama oqarpoq.
Illuanik kalerrisaarutilersuisoqarsinnaavoq, nunap sisoornissaanut kalerrisaarisinnaasunik.
Taakkuli inissinneqarnissaa qaammatinik arlalinnik sivisussuseqarsinnaasoq nalilerpaa.
Upalungaarsimanermut ataatsimiitaliap Nuugaatsiamut Illorsuarnullu isumannaatsuuneq, GEUS-imit siunnersorneqarneq tunuliaqutaralugu naliliivoq. Taakku nalilersuinerit tunuliaqutaralugit nunaqarfiit marluk siunissaat pillugit Naalakkersuisut aalajangiisariaqalertussaassapput.
- Tamatuma peqatigisaanik Uummannami eqqaanilu najugaqartut eqqarsaatigalugit nuannaarutigaara, Uummannami sumiiffimmiluunniit nunaqarfinni allani ulorianartorsiortoqavinngitsoq Upalungaarsimanermut Ataatsimiititaliamit naliliiffigineqarmat, ataatsimiititaliami siulittaasoq Mette Skarregaard oqarpoq.
Kalaallit Nunaanni Upalungaarsimanermut Ataatsimiititaliaq kalaallit sullissisut aamma naalagaaffimmi oqartussaasut suliaqarfii akimorlugit ajornartoornermik pingaarnertut aqutsinissamut akisussaasuuvoq.
Ajornartoornerup aallartinnerani pisuni siulliuniarlutik ulloq unnuarlu sulisimapput. Katillugu aqqaneq-marloriarlutik ataatsimiissimapput.
- Uanga Upalungaarsimanermut Ataatsimiititaliamut siulittaasutut oqartussaasut akimorlugit suliniuteqarneq nersorluinnarpara, Mette Skarregaard oqarpoq.