Nutserinermut aningaasartuutit ukiut amerlanngitsuni marloriaatinngungajattut

Namminersorlutik Oqartussat nutserinermut aamma oqalutsinut aningaasartuutaat ukiut arfinillit ingerlanerini 2011-mit 13,8 millionit koruuninit 2016-imi 24,5 millionit koruuninut amerleriarput.

Sulisut allat nutserisuunngitsut ilaatigut nutserinermik suliaqarsinaasarnerat pissutigalugu, anignaasartuutit 2016-imi 24,5 millionit koruuniusunit amerlanerusinnaasut, aningaasaqarnermut naalakkersuisoq Pele Broberg paragraf 37 naapertorlugu Jens Napãtôkimut akissuteqarnermi ilisimatitsivoq.

Kisitsisit eqqortut amigaataasut

- Kingulliullugit taaneqartut aningaasaqarnikkut periutsimi nalunaarsorneqarneq ajorput. Aammattaaq suliassanik naammassinninnerni taama ittuni ingerlatat tulleriiaarnilersukkanik nalunaarsorneqartanngillat. Taamaammat aningaasartuuterpiaat katillugit annertussusilerneqarsinnaanatik, Pele Broberg akissummini ilisimatitsivoq.

Qulaani tabelimi aningaasaqarnermut naalakkersuisoqarfiup nutserisut Namminersorlutik Oqartussani atorfillit aamma Namminersorlutik Oqartussanut avataanit nutserisunut ingerlatseqatigiiffinnullu nutserinermut aningaasartuutit kisitsisaatai takuneqarsinnaapput.

2011 tikillugu ilisimasat

Jens Napãtôk Namminersorlutik Oqartussat nutserinermut aningaasartuutinut takussitissat 2009-mit 2016-imut piumasimavai.

Kisianni Namminersorlutik Oqartussat naatsorsuinermut atortuini 2011-ip sioqqullugu naatsorsuutit takuneqarsinnaanngimmata.

Pele Brobergip aamma Partii Nalerarmioqatini kommunit nutserinermut oqalutsinullu aningaasat qanoq amerlatigisut atorsimaneraat paasissutissanik ikiorsinnaanngilaa. Taamaammallu kommunimut toqqaannartumi saaffiginninnissaminut innersuunneqarpoq, Namminersorluti Oqartussat ilisimasat taakku piginngimmatigit.

Powered by Labrador CMS