Skip to main content

Nutartigaq: Polar Seafood Islandermiunit tiguarneqalinnginnerarpoq

Polar Seafoodip siulersuisuini siulittaasuata, suliffeqarfik Islandimi soqutiginnittunit pisiarineqalinnginnerarpaa. Kisianni taassuma saniatigut kinguaariit nikinnissaannut isumaqatiginninniarnerusinnaasut oqaaseqarfigerusunngilai

Kalaallit Nunaanni aalisarnermut suliffeqarfissuit namminersortut annersaata, Polar Seafoodip, Islandimiut soqutiginnittut suliffeqarfik pisiarilinngikkaat oqaatigaa.

Savalimmiut nittartakkakkut aviisianni VP.FO-mi allaaserisami, 'suliffeqarfik Islandermiunut tunineqarnissaanut pilersaaruteqannguatsiartoq' saqqummiunneqarnerata kingorna eqqunnginneraaneq pivoq.

Islandimi suliffeqarfiit
Allaaserisami aamma atuarneqarsinnaavoq, Islandimi suliffeqarfik Brim pisisinnaasut ilagigaat, kisianni ingerlatsivik pisinissamut naammattunik aningaasaateqanngitsoq. Taamaattumillu aalisarnermut suliffeqarfissuaq Samherji hf pisisuunissaat piviusorsiornerusoq.

Aammattaaq atuarneqarsinnaavoq, Kalaallit Nunaanni aalisarnermut inatsit allanngorteqqaarlugu, nunami allamiut aalisarnermut inuussutissarsiornermi ullumikkumit annertunerusumik piginnissinnaanngorlugit allanngueqqaarluni pisineq naammassineqarsinnaasoq.

Ingerlatsiviup Islandimiunit pigilerneqarnissaanut ilumuunnginnerarnerata saniatigut, siulersuisuni siulittaasup Henrik Lethip suliaq oqaaseqarfigeqqinnissaa kissaatiginngilaa.

Kinguaariit nikinnerat
Henrik Lethip illuanik erseqqissarpaa, suliffeqarfissuup ukiuni arlalinni kinguaariit nikinnissaannut aaqqiissutissamik sulissuteqartoq, pissusissamisoortumik pisariaqarmat piginnittut utoqqaliartiunnarmata.

Atuaruk: Polar Seafoodip sinneqartoorutini 100 millionit koruuninik annertusivaa

- Tamannali ajornaatsuinnaanngilaq, suliffeqarfik nunani tamalaaniittoq pineqarmat, soorunami Kalaallit Nunaanni aalisarnermut inatsisip piumasaqaatai malillugit ingerlatsisussaq. Pigittuunermut piumasaqaatit annertuut ilanngullugit, Henrik Leth tusagassiuutinut nalunaarummi erseqqissaavoq.

Oqaaseqaqqikkusunngitsoq
- Savalimmiormiut isumaliutersuutaat oqaaseqarfigeqqikkusunngilakka, kisianni erseqqissaatigiinnassavara kinguaariit nikinnissat soorunami Kalaallit Nunaanni aalisarnermut inatsit naapertorlugu piumaartoq, tassani aalisarnermut inatsimmi piginnittuunermut malittarisassat ilanngullugit, taanna oqarpoq.

Polar Seafood sapinngisamik ataatsimoortinneqarnissaa piginnittunit annertuumik kissaatigineqarpoq, suliffeqarfissuaq ukiuni 30-t sinnerlugit alliartortinneqarsimasoq, sapinngisaq tamaat aaqqissuussaanera atorlugu ingerlaqqinniassammat, suliffeqarfik erseqqissaavoq.

Suliffiit attatiinnarneqassasut
- Taamaalilluta suliffippassuit sulisutsinnut tatiginartunut pitsaanerpaamik qulakkiissavagut, aammalu Polar Seafoodip aningaasaqarnikkut nunami suliaqarfigisatsinni tapersiinini attatiinnarnissaa. Minnerunngitsumik Kalaallit Nunaanni, tassani siorna pisortat aningaasaateqarfiinut 316 millionit koruuninik tapiivugut, tamanna akileraarutit 4 procenterivaat, Henrik Leth oqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER