Nutaat 25-t tunillatsissimasut - sisamat unitsinneqarsimapput
Tunillatsissimasut nutaat 25-t pingasunngornermi nalunaarsorneqarsimapput, taakkunannga ataaseq corona pissutigalugu Upernavimmi napparsimmavimmut unitsinneqasimavoq. Pingasut tunillatsissimasut allat Nuummi napparsimmavimmut unitsinneqarsimapput, taakkuli corona pissutigalugu unitsinneqarsimanngillat.
Ullormi kingullermi tunillatsissimasut nutaat 25-t nassaarineqarsimapput. Taakkunannga 23-t Nuummi najugaqarput, ataaseq Kangerlussuarmi ataaserlu Upernavimmi, Nunatsinni Nakorsaaneqarfik nun.gl-ikkut taamatut ilisimatitsissuteqarpoq.
Nunami tamarmi maannakkut tunillatseqqasut 179-iupput.
Tunillatsissimasoq nutaaq Upernavimmi nassaarineqartoq maannakkorpiaq covid-19 pissutigalugu Upernaviup Peqqissaaviani uninngatinneqarpoq.
Napparsimasut pingasut COVID-19-imik tunillatsissimasut Dronning Ingridip Napparsimmavissuani uninngapput. Taakkuli tamarmik allamik nappaateqarnertik pissutigalugu uninngallutik.
Meeqqat akornanni suli tuniluuttoqartoq
Nuup atuarfiini tamani suli tuniluuttoqangaatsiarpoq. Tunillatsissimasut nutaat amerlanersaat Kanngillinnguit Atuarfiani aamma Atuarfik Ukaliusami (USK) atuartuupput. Sapaatip-akunnerata matuma ulluini siullerni marlunni USK-imi tunillatsissimasut nutaat qulingiluat nassaarineqarput.
Fritidshjemmemi Narsarmiutami sapaatip-akunnerani matumani ullut siulliit marluk tunillatsissimasut nutaat tallimat nassaarineqarsimapput. Suliffeqarfinni siusinnerusukkut tunillatsiffiusimasuni ataaseq tunillatsissimavoq.
