Nutaarsiassatsialak: Munckikkunni tunillatsittoqaqqissimanngilaq

Nuummi Munck Gruppimi sulisut sapaatip akunnikkaartumik misissortimmata, nutaamik tunillatsittoqarsimanngitsoq paasineqarpoq.

Munck Gruppimi pisortaaneq, Hans Christian Munck tusagassiorfinnut taama nalunaaruteqarpoq.

- Nuummi suliaqarfimmi tunillaassuuttoqannginnissaanut iliuuserisagut iluatsissimammata soorunami nuannaarutigaarput oqiliallaatigalugulu. Campimi sanaartorfimmilu sulisut iliuusissanik Nakorsaanerup aamma Corona pillugu Allattoqarfiup innersuussutaanik atuutsitsilerniarlutik tunniusimalluinnarsimapput, maannalu iluaqutaalersut takusinnaavarput, Hans Christian Munck tusagassiorfinnut nalunaaruteqarluni oqaaseqarpoq.

Mittarfissualiornermi sulisut oqartussanit sukannersunik malittarisassaqarput, soorlu aamma mittarfissualiornermi sanaartorfik mattusimaffiugallartoq. Taamaattumillu sulisut imminnut qanillinaveersaartussatut bobleniitinneqarlutik. Tamanna aamma isumaqarpoq sulisut illoqarfimmi najugaqartut sulinnginnerminni angerlarsimaannartussaatitaasut, campimilu najugaqartut sanaartorfik qimassanngilluinnaraat nakorsiassanngikkunik misissortissanngikkunilluunniit.

Sulisunut kaagillertut

Nuummi innuttaasut ilaat mittarfissualiornermi sulisunut kaagiliorsimapput qiimmassaalaarumallutik, pisortaaneq oqaluttuarpoq.

- Sulisutsinnut isumaqartorujussuuvoq piffissami matumani allanit eqqaamaneqarnerat. Allanut qanillinngilluinnarluni piffissami sivisuumi inissisimaneq ilungersunartuuvoq - pingaartumik ilisimanngikkaanni qaqugu inuunermut nalinginnaasumut uteqqissalluni, Hans Christian Munck oqarpoq kajumissutsiminnillu kaagiliortut qutsavigalugit.

Munck Gruppimi sulisut sapaatiummat nerisassanik agguaavigineqaramik ilanngullugit muffins aamma kringlet tunniunneqarsimasut pivaat.

Oqartussanut oqaloqatiginnilersut

Nuummi mittarfissualiorfiup campiani tunillatsissimasumik kingullermik 4. juni nassaaertoqarpoq. Munck Gruppimit oqartussanik oqaloqateqarnissaq maanna siunniunneqarpoq, sulisunut killilersuutit sakkukillinissaat pillugu, suliallu tamakkiisumik suliarineqaleqqinnissaat anguniarlugu.

- Pissutsit nalinginnaanerusumik ingerlateqqilernissaat, suliallu tamakkiisumik suliarilernissaat pillugu oqartussanik oqaloqateqalernissatsinnut qilanaarpugut - soorunami suliat ingerlanneqarneri peqqinnissaq pillugu maleruaqqusanik atuuttunik ataqqinnittumik ingerlanneqassapput, suliniuterput inuiaqatigiillu najukkagut illersorniarlugit, Hans Christian Munck oqarpoq.