Nutaarsiassatsialak: Meeqqat innarluutillit pitsaanerusumik kommunimit sullinneqalersimapput
Meeqqat innarluutillit atugaat MIO-p meeqqallu illersuisuata kujataani 2016-imi angalaneranit pitsanngoriaateqarsimapput. Sulili pitsanngoriartitsinissamut inissaqarpoq, inuit innarluutillit illersuisuat erseqqissaavoq.
MIO aamma meeqqat illersuisuat Kommune Kujallermi 2016-imi angalareerneraniit pitsanngoriaateqartoqarsimavoq.
Meeqqat atuarfianni immikkut atuartitsisarneq aamma allamik immikkut ittumik perorsaanikkut ikiorsiisarneq pillugit, nalunaarut 1998-imeersoq 2017-imi nutarterneqarpoq. Illoqarfiit ilaanni atuarfinni immikkut ittumik atuartinneqartut atuartut allat atuartitsiviisa eqqaanni atuartinneqartarput, akuunerulersinneqarlutik. Meeqqat innarluutillit atuarfinni inissaqarluarput. Qaqortumilu immikkut atuarfiusumi Tungujortuaqqami, meeqqat immikkut pisariaqartitsisut meeqqallu annertuumik innarluuteqartut atuarfianni, ilisimasat atuartitsinissamullu misilittakkat annertoorujussuupput.
- Tiliup malugaa misilittagartussuseq, immikkut atuartitsinermut ilisimasaqarneq aamma ilinniartitsisunit perorsaasunillu immikkut atuarfimmi tassani atorfeqartunit annertuumik tunniusimasoqartoq. Erseqqippoq tassani meeqqat ilikkarnissaannik aamma ineriartornissaannik qularnaariniarluni piginnaaneqassutsit pigineqartut, inuit innarluutillit illersuisuata angalanerminit nalunaarusiaani, marlunngornermi decemberip pingajuani saqqummiunneqartumi allassimavoq.
Unammilligassat allat
Allanilli suli unammillernartoqarpoq, suli pitsanngortinneqarsinnaasunik.
Inuit innarluutillit illersuisuata nalunaarusiamini erseqqissarpaa meeqqat innarluutillit meeqqallu immikkut pisariaqartitsisut nalunaarusiami immikkoortissimanagit, meeqqat tamarmik assigiimmik ilinniarnissamik ineriartornissamillu pisinnaatitaaffeqarnerat pissutigalugu.
Atuartut immikkut atuartitsivinni atuartinneqartut assigiinngitsunik pisariaqartitaqarput, meeqqat innarluutillit meeqqallu immikkut pisariaqartitsisut ataatsimoorlutik atuartinneqartarlutik. Tungujortuaqqami ilinniartitsisut ilisimasaat atuarfinni allani ilinniartitsisunut avitseqatigiissutigineqarneq ajorput.
Ilanngullugu ilinniartitsisunit tikkuarneqarpoq kommunip atuarfiillu akornanni suleqatigiinniarneq suli unammillernartorpassuaqartoq.
- Tilioq ilisimatinneqarpoq sulianik arriitsumik ingerlatsisarneq ilungersuutigineqartartoq. Tamannami atuarfimmik pisarialimmik ikiuinissamik aamma tapersersuinermik pilertortumik neqerooruteqarsinnaasannginneranik kinguneqartarpoq, pissutigalugu tamanna kommunimit akuerineqaqqaartussaammat, Tiliup angalanermit nalunaarusiaani allassimavoq.
Taamaammat Tilioq ilaatigut innersuussuteqarpoq, atuartitsinermi ilisimasaqareersut atorneqarnerussasut, meeqqat immikkut pisariaqartitaqartut pillugit kommunip atuarfimmut suleqateqarnini pitsanngorsassangaa, aammalu ilinniartitsisunngorniat ilinniartitsusullu ilinniaqqittut, atuartut assigiinngitsunik innarluutillit peqataatinnerunissaannut ilinniartinneqarnissaat Ilinniartitaanermut Naalakkersuisoqarfiup Ilinniarfissuullu qulakkiissagaat.