Nutaarsiassat nuannersut: Uffartoqarlunilu eqqiaasoqarsinnaanngorpoq
Uummannami erngup aqqutaa tamarmi uffarnissamut, errorsinissamut aamma eqqiaanissamut atorneqarsinnaanissaa akuersissutigineqarpoq. Taamaattoq imeq suli imerneqaqqusaanngilaq
Uummannami innuttaasunut nuannersumik nutaarsiassaqalerpoq.
Tassami Uummannami erngup aqqutaa tamarmi uffarnissamut, errorsinissamut aamma eqqiaanissamut atorneqarsinnaanissaa akuersissutigineqarpoq.
- Pinngortitamut Avatangiisinullu Naalakkersuisoqarfiup Nunatsinni Nakorsaaneq isumasioqatigalugu ullormi 21. oktobarimi 2019 aalajangerpaat erngup atorneqarsinnaanerata killilersorneqarnera allanngortinniarlugu Uummannami erngup aqqutaani sinneruttuni imaalillugu; imeq maanna uffarnermut, atisanik errorsinermut, erruinermut aamma eqqiaanermut atorneqarsinnaalerpoq, Nukissiorfiit allapput.
Imerneqaqqusaanngilaq
Imeq suli imerneqaqqusaanngitsoq ilisimatitsissutigineqarpoq.
- Imermi suli uuliaqalaarsinnaavoq, kisianni Pinngortitamut Avatangiisinullu Naalakkersuisoqarfiup aamma Nunatta Nakorsaanerata nalilerpaat uffarnissamut, atisanik errorsinissamut, erruinissamut aamma eqqiaanissamut atorneqarsinnaasoq, nalunaarutigineqarpoq.
Tamatuma saniatigut tankit imiisiviit 35-t akuerineqarput uffarnermut, atisanik errorsinermut, erruinermut aamma eqqiaanermut atorneqarsinnaasunngorlugit.