Avannaa

Nutaarsiassaqartitsiviup provinsimi aviisimi aappaa unitsippaa

Ukiut sisamaata affaa annoncinik tunisaqarpiassanani ingerlatereerlugu Nutaarsiassaqartitsivik Sermitsiaq.AG aalajangerpoq Avannaani aviisini akeqanngitsoq unitsinniarlugu

Tamanut Avannaani ukiut sisamaata affaani Avannaani akeqanngitsumik agguaanneqartarsimavoq, ilaatigut Upernavimmi

Avannaani aviisi annoncinit isertitanik ingerlatilik Tamanut Avannaani 90-eriarluni saqqummersimavoq.

Nutaarsiassaqartitsiviup Sermitsiaq.AG-p pisortaa Poul Krarup aalajangerpoq aviisi matuniarlugu isertitaqartassaaleqineq pissutigalugu.

– Tamatuma kingunerissavaa Tamanut Avannaani tulliani saqqummersoq kinguliugallassasoq, Krarup ataarsinngormat annonciliisartunut nalunaaruteqarpoq.

Immaqa aallarteqqikkumaarpoq

Nunap immikkoortuani tamaani tusagassiortaqqilersinnaaneq pisortap tunuartinngilaa.

– Qaasuitsup Kommuniani aningaasaqarniarneq pitsaanerulissammat, niuertarfiillu assigiinngitsut annonciliiffissamik pisariaqartitsilissappata, soorunami aallarteqqinnissatsinnut piareersimavugut. Aamma allanik aaqqiissutissarsiornissamut piareersimavugut, soorlu taavani naqitertarlugu imaluunniit on demand-imik, imaluunniit Tamanut Avannaani E-aviisitut saqqummersittalerlugu.

Februaarip 2-anni Krarup aalajangerpoq sumiiffimmi aviisip aappaa Tamanut Kujataani aamma tamakkorpiaat pissutigalugit matuniarlugu.

Nutaarsiassaqartitsivik aningaasaqarniarnikkut tatineqarpoq, aviisinik nuna tamakkerlugu saqqummersitsisarfituamut ukiumoortumik tapiissutit Naalakkersuisunit peerneqarnerisa kingorna. Tamatuma saniatigut annoncinik tuniniaaneq tatineqarpoq, tassa unammilertit nutaat aamma ussassaarutinik tuniniaallaqqimmata.

Amigartooruteqarluni ingerlasoq

– Tamanut Avannaanimi annoncitigut isertitat ukioq manna missingersuutitigut anguniakkat angunngilaat, taamaasillunilu naqiterneqarneranut, siammarsarneqarneranut, ilusilersorneqarneranut aaqqissuisoqarneranullu aningaasartuutit matussutissinnagit, Poul Krarup oqaluttuarpoq.

Aviisi akeqanngitsoq siullermik 2012-mi novembarimi saqqummersinneqarpoq.

Powered by Labrador CMS