Skip to main content

Nutaarsiassaqartitsivik: Trump konsulaateqarfimmik suli pilersitserusuppoq

Issittoq Avannarlermiinnerulernissaq anguniarlugu USA Nuummi konsulaateqarfimmik ammaanissamik pilersaaruteqarpoq. Pilersaarut ukioq manna maajimi saqqummiunneqaqqaarpoq.

USA-p præsidentiata Donald Trumpip naalakkersuinikkut ingerlatsinermi allaffeqarfiata Kalaallit Nunaanni konsulaateqalernissaq suli pilersaarutigaa, taamaattumillu nunatsinni konsulaateqarfimmik ammaaqqinnissaq suli pilersaarutigalugu.

Amerikami nunanut allanut tunngasunut ministeriaqarfiata Kongressimut allakkiaani tamanna atuarneqarsinnaavoq, allakkiarlu nutaarsiassaqartitsiviup AP-p pissarsiarisimavaa.

Nutaarsiassaqartitsivik naapertorlugu Nuummi konsulaateqarfik aappaagu ammarneqassaaq.

Amerikami nunanut allanut tunngasunut ministeri Mike Pompeo ukioq manna maajimi nalunaaruteqarpoq USA-p Kalaallit Nunaanni ataavartumik sinniisoqarfeqalernissaq kissaatigaa, pilersaarullu qaammammi tassani aamma saqqummiuteqqaarneqarpoq.

Konsulaateqarfik “USA-p Issittumi Avannarlermiinneranut ersiutit pingaarnersarissavaat, USA-llu Kalaallit Nunaanni soqutigisai tassuuna ingerlanneqarsinnaanerulissallutik”, nunanut allanut tunngasunut ministeriaqarfik allappoq.

Amerikamiut sumiiffimmiinnerat

USA ataatsimut isigalugu "issittumi politikkip, aningaasaqarnerup niuernerullu iluani atuuttut annertusarnissai soqutigilluinnarai”, ministeriaqarfik isumaqarpoq.

Tysklandip nazistiisa 1940-mi Danmark tiguarmagu USA Kalaallit Nunaanni konsulaateqarfimmik ammaavoq, konsulaateqarfilli 1953-imi matuneqarluni.

Konsulaateqarfimmik ammaaqqinnermi, taamaasillunilu Kalaallit Nunaanni diplomaateqartualernermi “Kalaallit Nunaanni pingaartitat pingaarnersaannik illersuisinnaanermik aammalu kalaallit atorfilittaannik inuiaqatigiivinillu attaveqarnerup pitsaanerulernissaannik pilersitsissaaq”.

Pisortatigoortumik tikeraarneqarnissaq kinguartinneqartoq

Danmarkimut pisortatigoortumik tikeraarnissaq septembarip aappaani pingajuanilu pisussaagaluaq kinguartillugu, Donald Trump pingasunngormat nalunaaruteqarmat uissuummisitsingaatsiarpoq.

Nalunaaruteqarnermi taaneqarpoq ministeriunerup Mette Frederiksenip (S) Kalaallit Nunaat USA-mut tunineqarnissaa eqqartorusunnagu nalunaarsimammat. Siunnersuut taanna kalaallit danskillu politikeriniit ersarilluinnartumik itigartitsissutigineqarpoq.

Oqallinneq “isumassaqanngilluinnartutut” Mette Frederiksenip taavaa.

Taama oqarneq præsidentimit tigulluarneqanngilaq, taassumalu ministeriunerup oqaaseqarnera “ajorluinnartutut” taavaa.

Sisamanngormalli Trump aamma Frederiksen oqarasuaatikkut oqaloqatigiipput.

Ministeriuneqarfiup tallimanngormat nalunaarutigaa Frederiksen aamma Trump oqarasuaatikkut isumatusaarnerusumik oqaloqatigiissimasut. Nunat aqutsisuisa ilaatigut oqaloqatigiissutigisimavaat sillimaniarnermi politikkikkut unammilligassat pillugit suleqatigiinnerup suliaqarnerullu inerisarneqarnissaasa pisariaqassusaat.

Donald Trump tusagassiortunut Det Hvide Hus-ip silataanut katersuussimasunut arfininngornermi ullaakkut oqarpoq Mette Frederiksen “arnaasoq pitsaalluinnartoq”.

- Oqaloqatigiilluarpugut. Nammineerluni sianerpoq, tamannalu pingaartilluinnarpara, Donald Trump nutaarsiassaqartitsivik AP naapertorlugu taama oqarpoq.

Ilanngullugu erseqqissarpaa USA Danmarkilu pitsaasumik ataqatigiitsut.

Danskit nunanut allanut tunngasunut ministeriaqarfiata amerikap Kalaallit Nunaanni konsulaateqarfimmik aappaagu pilersitsinissamik kissaateqarnera uppernarsarumanngilaa.

Ministeriaqarfiulli maajimi uppernarsareerpaa USA-p Kalaallit Nunaanniinnerulernissaanut periarfissat pillugit oqaloqatigiittoqartoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER