Nutaanik tallimanik tunillatsittoqarsimavoq

Inuppassuit misissortissimagaluartut, tallimaannaat tunillatsissimasut nassaarineqarsimapput, Nunatsinni Nakorsaaneqarfik ilisimatitsivoq.

Malugiuk, tunillatsissimasut amerlassusaat tallimaniit sisamanut ikilisinneqarsimapput, Coronamulli atatillugu allattoqarfik oqaloqatigereerlugu tallimanngortinneqaqqissimallutik.

Tunillatsissimasut nutaat sisamat Nuummi Sisimiunilu nassaarineqarsimapput, ataaserlu Maniitsumi nassaarineqarsimalluni. Maniitsumi tunillatsissimasoq peqqinnissaqarfimmi sulisuuvoq, tamannalu pingasunngormat unnukkut nalunaarutigineqarpoq.

Nunatsinni Nakorsaaneqarfimmit oqaatigineqarpoq, misissuisoqangaatsiartoqarsimagaluartoq ikittuinnaat tunillatsissimasut paasineqarsimasoq.

- Nuummi marluk Sisimiunilu marluk tunillatsissimasut paasineqarpoq, Illoqarfinni taakkuna pineqartuni tunillatsissimasut tunillatsissimasutut ilisimaneqareersunit tunillanneqarsimapput.

- Inuit ulluunerani paaqqinnittarfimmut atassuteqartut illoqarfiullu qeqqani atuarfimmi klassinut pingasunut atassuteqartut suli kisimik tunillatseqqapput, Nunatsinni Nakorsaaneqarfik allappoq.

Maniitsumi sulisoq napparsimasumit tunillanneqarsimasinnaasoq

Nakorsaaneqarfimmit aamma ilisimatitsissutigineqarpoq, septembarip arfineq-pingajuani Nuummi inuit 670-it missaanniittut Sisimiunilu inuit 200-t missaanniittut misissortissimanerannik misissueqqissaartoqarsimasoq.

Maniitsup peqqinnissaqarfiani sulisumut tunillatsissimasumut atatillugu Nunatsinni Nakorsaaneqarfiup ilisimatitsissutigaa, maannamut misissuisimanerit naapertorlugit unillatsissimasoq napparsimasumit tunillatsissimasinnaasoq:

- Illoqarfimmi tuniluuttoqalersinnaanera pinngitsoortinniarlugu, tunillaassuisumik nassaarniarluni misissuisoqaleruttorpoq, nakorsaaneqarfik allappoq.

Pingasunngormat tunillatsissimasut siullermeersumik amerleriasaarujussuarput, oqartussat nalunaarutigimmassuk Nuummi 17-inik tunillatsittoqarsimasoq.

Powered by Labrador CMS