Skip to main content

Nutaanik maleruagassaqartoqalernerani nunat tamalaat akornanni ilisimatusartut Kalaallit Nunaanni ilisimatusariartoriaannaajunnaartut

Nunanit allani ilisimatusartut Station Nordimut toqqaannartumik timmisartorlutik tikissinnaajunnaarput. Ajorluinnarpoq, professori oqarpoq.

Villum Research Station Station Nordip eqqaani inissisimasoq nunanit allanit ilisimatusariartortunit orninneqariaannaajunnaarpoq. Taamaalisoqarneranut pissutaavoq Station Nordimut toqqaannartumik timmisartortoqarsinnaajunnaarmat, aatsaalli Ittoqqortoormiit eqqaaniittoq Nerlerit Inaat, politeeqarfiusoq, aqqutigeqqaarlugu tikittoqarsinnaalermat.

- Ajorluinnarpoq, professori Henrik Skov Aarhus Universitetianeersoq, Villum Research Stationimi aqutsisoq, oqarpoq.

Nunanit allanit ilisimatusartut maannamut immikkut akuerineqarlutik Station Nordimut toqqaannartumik timmisartorlutik tikissinnaasaraluarput. Tamannali januaarip aallaqqaataat aallarnerfigalugu allanngortinneqarpoq.

Nerlerit Inaat aqqutigalugu akisuallaarpoq

Svalbard aqqutigalugu angalasoqartaraluarpoq, tassuuna angalaneq sivikinneruvoq akikinnerullunilu. Svalbard aqqusaarlugu timmisartorneq 125.000 koruuninik akeqarpoq. Tunuli aqqusaarlugu angalaneq 500.000 koruuneqassaaq. Akillu nikinganerujussuat pissutigalugu angalasarnissaagaluit ingerlanneqarsinnaanngillat.

- Tamanna isumaqarpoq Villum Research Station nunanit allanit ilisimatusartunut matugallartoq. Erloqinarluinnarpoq, piffissarujussuarmi atorlugu ilisimatusarfissap ilisimaneqalernissaa anguniarneqartarpoq. Tamassuma saniatigut ilisimatusarniarlutik suliniummik isumassarsinermiit ukiut marluk pingasut qaangiukkaangata aatsaat angalanissamut aningaasanik naammattunik katersisoqarsimasarpoq, Henrik Skov oqarpoq.

Aaqqiissuteqarallartoqarnissaannik neriuuteqartut

Ilisimatusartulli Station Nordimut toqqaannartumik angalasaleqqinnissaat anguniarlugu aaqqiissummik nassaartoqassagaluarpat, nunat tamalaat akornanni ilisimatusartunit sumiiffiup ilisimaneqaleqqinnissaanut aallaqqaataaniit sulisoqaqqaartariaqalertoqarsinnaavoq. Maannakkut itsillugu, illersornissaqarfik aqqutigalugu timmisartumut ilaalluni ilisimatusarfimmukartoqarsinnaavoq. Illersornissamillu suliaqartut suleqataarusukkaluartut, timmisartoq ilaasussanik inissaqarnersoq apeqqutaalluinnarpoq. Ilisimatusarnissamullu akisuumut pissutsit taama ittut tunngavissaanngillat.

Henrik Skov nassuiaavoq aaqqiissutaagallarsinnaasumik siunnersuummik ukiumi 2019-imi atuuttussamik Naalagaaffiup politiivinut nassiussisimalluni.

- Siusinaartumik nalunaarfigineqarsimannginnerput uggornarpoq, aaqqiissuteqarnissamummi siunnersuuteqarluta peqataasimasinnaagaluarpugut, oqarpoq.

Aaqqiissuteqarallarnissamullu siunnersuut akuerineqassasoq, aaqqiissutissamillu ataavartussamik ujaasisoqassasoq, maanna neriuunnarsinnaanngorpoq. Aaqqiisoqassanngippalli nunat tamalaat akornanni ilisimatusarnissat Villum Research Station peqataaffigisinnaajunnaassavai.

IA-p folketingimut ilaasortaatitaata Aaja Chemnitz Larsenip tamanna inatsisinik atuutsitsinermut ministerimut Søren Papa Poulsenimut (K) apeqquteqaatigaa.

Villum Research Station Namminersorlutik Oqartussanit pigineqarpoq Aarhus Universitetimiillu ingerlanneqarluni. Ilisimatusariartortarfik 2014-imi ammarneqarpoq.

Velkommen til debatten
  • Sermitsiaq.AG ønsker en konstruktiv og god debattone blandt vores læsere uanset uenigheder. Overtrædelse af vores debatregler kan føre til udelukkelse.
  • Anmeldelser af grove kommentarer kan ske ved at klikke på "rapporter" eller ved at ”markere som spam”.

Forsiden lige nu

SENESTE NYHEDER