Nutaamik periarfissaqalissasoq: Ilinniartutut isumaqatigiissuteqaqqaarnak ilinniartunngorit
Naalakkersuisut inatsimmi qitiusumik piumasaqaat peerniarlugu sulissuteqarput, taamaalilluni inuussutissarsiummik ilinniartutut sioqqutsisumik isumaqatigiissusioqqaarnani ilinnialertoqarsinnaassaaq. Siunnersuut Sulisitsisunit tapersersorneqarpoq, kollegianut inissanik naammattunik pissarsinissaq pingaaruteqartoq taakku eqqaasitsissutigaat.
Nunatsinni suliffeqarfeqarneq ukiuni arlalinni suliaqarfiulluarpoq, innuttaasullu assersuutigalugu inuussutissarsiummik ilinniagaqartut akornanni suliffissarsiortut amerlanngillat.
Tamatuma peqatigisaanik inuusuttut amerlanerusut inuussutissarsiummik ilinniagaqartut amerlanerunissaat politikerinit kissaatigineqarpoq, Naalakkersuisullu siunnersuutaannik anguniagaq tamanna angulertorneqassaaq.
Siunnersuut tusarniutigineqarpoq, inuussutissarsiutinik ilinniartitaaneq pillugu inatsisip allanngorneqarnissaa siunertarineqarpoq, taamaalilluni inuusuttut suliffeqarfimmut sioqqutsisumik isumaqatigiissuteqarnatik ilinniakkamik aallartitaqarsinnaalissapput.
KTI: Aporfiuvoq
Naalakkersuisut oqarnerat naapertorlugu ilinniartitaaneq pillugu januaarimi 2022-mi isumasioqatigiisitsinermut atatillugu siunnersuut saqqummiunneqarpoq. Ilinniarnerup aallartinnera sioqqullugu sioqqutsilluni isumaqatigiissusiornissamut piumasaqaatip atorunnaarsinneqarnissaa ilaatigut KTI-mi innersuunneqarpoq, KTI-mit aporfittut isigineqarmat, inuusuttullu ilinniakkamik aallartitaqarnissaannut pinngitsoortitsisarmat.
KTI-mi ilaatigut inuussutissarsiummik assersuutigalugu saviminilerinermik, aatsitassarsiornermik sanaartornermillu ilinniarfeqarpoq.
Piumasaqaat kinguartinneqassasoq
Inuussutissarsiummik ilinniarfiit ilaasa inissaqartitsinertik ilinniartunik amerlanerusunik akuersinikkut atorluarsinnaassagaat, Naalakkersuisut tamatuma peqatigisaanik naliliipput.
Ilinnialernissamut isumaqatigiissusiornissamulli piumasaqaat atorunnaarsivinneqassanngilaq, kisianni ilinniarnerup aallartinneranit ukiumik ataatsimik kinguartinneqarsinnaasoq eqqarsaatigineqarpoq, ilinniartoq taamaalilluni tunngaviusumik ilinniakkamut akuerisaasoqarsinnaassaaq, kingusinnerusukkullu suliffeqarfimmut imaluunniit ilinniarfimmi praktikkernissamut isumaqatigiissusiortoqarsinnaassaaq.
Piumasaqaammik atorunnaarsitsineq inoqarfinnit mikinerusunit qinnuteqartartut amerlanerulernissaannik kinguneqarsinnaavoq, taakku suliffeqarfimmik ilinnialerfissaminnik nassaarnissamik ajornakusoortitsisinnaapput, suliffeqarfiit amerlannginnerat pissutigalugum Sulisitsisuni Sanaartornermik suliaqartunut imilerisunullu ataatsimiititaliaq taama isumaqarpoq.
Sulisitsisut: Inissat aamma ilinniartitsivinni inissaqarneq eqqaamallugit
Inatsisissatut siunnersuut piaarnerpaamik naammassineqartariaqartoq, Sulisitsisut tusarniaanermut akissuteqaammi allapput.
Sulisitsisulli aamma oqariartuutigaat, nunaqarfinni suliffissarsiortuni inuusuttut 18-25-illu akornanni ukiullit amerlanerpaasut allappaat, tassanilu Sulisitsisut oqarnerat naapertorlugu ujartuilluni siunnersuisoqartariaqarpoq:
- Naalakkersuisut nunap karsianit aningaasat killeqartut atorlugit ilinniarfinnut qitiusumik ilinniarfinnut aningaasatigut sinaakkutinut pisariaqartunut qulakkeerinninnermut atortariaqaraat, Sulisitsisut inassutigerusuppaat, taamaalilluni inuusuttunut sioqqutsilluni isumaqatigiissusioqqaarnani ilinnialertunut kollegiani ilinniarfinnilu inissat naammalissammata.
2021-mi ilinniartut 785-iusut, Naatsorsueqqissaartarfimmi kisitsisit takutippaat. Tamanna 2020-mut sanilliullugu 2 procentinik qaffariarneruvoq, kisianni 2012-miilli 165-inik ikileriaateqarput.