'Nutaamik partiileerunnaarniaritsi sinnattuaqiinnarpusi'

Vittus Qujaukitsoq partiimik pilersitsiliivippoq, Michael Rosingilu partiimik talerperliuniamik aamma pilersitsilerluni.

Nunatsinnilu partiit amerlanerit pisariaqartinneqanngitsut, politikeri inuusuttoq, Bentiaraq Ottosen (A), isumaqarpoq.

- Politikkerit ukiuni kingullerni inuiaqatigiit akornanni paatsiveerussaariinnartutut nunatsinni ingerlatsinerat inuiaqatigiit akornanni politikkikkut ingerlatsinermi soqutiginarsaanissaq killeqartorujussuanngorsimavoq, nunatsinnullu tamanna akisoorujussuusaaq, taanna tusagassiuutinut nalunaarummi allappoq.

Atuartartut: Partiinut nutaanut inissaqarpoq

Politikkikkut sulinermi sinnattuaqineq unitsinneqartariaqartoq, taanna isumaqarpoq.

- Sinnattuaqinersuaq politikkerertatta akornanni ingerlanneqarnera inuiaqatigiinni namminiilivinnissamik eqqarsartunik akilersinnaannginnera oqariartuutigisariaqarpara, uaniimmammi nutaamik partiiliorneq ataqqineqarnerulersimanera, anguniakkat inuiaqatigiit akornanni salliutinnagit imminuinnaq pingaartitat ilusilersorlugit anguniagaqartarneq inummi partiiliorniartumi misigissutsikkut aallaaveqartumik inuiaqatigiinni kiffartuusiniarnera siunissami anguniakkanik annertunermik killiliisuusaaq, taanna isornartorsiuivoq.

Partiit nutaat inuiaqatigiinnut ilumut iluaqutaassanersut, Bentiaraq Ottosenip apeqquserpai.

Taasititsineq: Partiit nutaat pisariaqartinneqarpat?

- Ilumut politikkerertagut inuiaqatigiinnut kiffartuuserusunnerput imaluuniit imminuinnaq sullikkusunnerput?, taanna aperivoq.

Inuiaqatigiinnulli ersarissumik oqariartuuteqarpoq:

- Inuiaqatigiit eqqarsartariaqalerpusi ilissi tassaavusi inuiaqatigiit akornanni inuit tamat oqartussaaqataanneranik aaliangiisartut, ilissi tassaavusi ulluinnarni inuunissinni naleqartitasi qaqikkusukkissi nalunngilarsili politikkeriugaanni imaanngilaq inuk qaffattoq inuiaqatigiinni kiffartuusissasoq takusariaqarparsi, Bentiaraq Ottosen oqarpoq.