Nutaamik naliliineq: Karrat Kangerluanni qaqqap innaa sisooriaannaavoq

GEUS-ip misissuisimanerata kingulliup takutippaa, Karrat Kangerluanni qaqqap nikerarnera suli annertusoq.

GEUS-ip qaqqat innaasa sisoorsinnaanerannik tassaarsuaqarnissaanullu ulorianartoqarnera pillugu naliliisimaneranik Kalaallit Nunaanni Upalungaarsimanermut Ataatsimiititaliaq tigusaqareersoq, Namminersorlutik Oqartussat tusagassiorfinnut nalunaaruteqarlutik allapput.

2017-imi juunip qaammataani Karrat Kangerluanni qaqqamik sisoortoqarpoq. Qaqqap sisoornera taanna tassaarsuaqartitsivoq, Nuugaatsiaq aamma Illorsuit eqqugaallutik.

Qaqqap innaa ulorianartumik sisooriaannaasoq

- GEUS naliliivoq, sumiiffinni ulorianartorsiorfiusuni qaqqat annertuumik sisoorsinnaanerisa ilimanaateqarnerat allannguuteqanngitsoq, taamaattumillu tassaarsuaqarsinnaaneranut ulorianartorsiornerup qaffasissorujussuunera allannguuteqarani, nalunaarummi allassimavoq.

GEUS-imit eqqoriaruminaatsinneqarpoq, sumiiffimmi qaqugu sumerpiarlu qaqqat sisoorneri annertunerusut pissanersut.

- Aamma sumiiffiit annertoorsuarmik ulorianartorsiorfiusut arlaqarmata, siunissami aamma qaqqat annertunerusumik sisooreernerisa kingorna qaqqanik nutaamik sisoortoqarnissaanut annertoorsuarmik ulorianartorsiortoqassasoq naatsorsuutigineqartariaqarpoq, nalunaarummi erseqqissaatigineqarpoq.

Nunaqarfinni innuttaasunut nutaarsiassatsialaanngittoq

Kalaallit Nunaanni Upalungaarsimanermut Ataatsimiititaliaq naliliivoq, Nuugaatsiaq aamma Illorsuit aammalu kangerloqarfillu inissisimaffigisaat ulorianartorsiorfiusutut suli isigineqartariaqartut.

- Tamatuma malitsigisaanik Kalaallit Nunaanni Upalungaarsimanermut Ataatsimiititaliaq naliliivoq, innuttaasut tunngavissat pigineqartut tunngavigalugit Nuugaatsiamut aamma Illorsuarnut suli utertariaqanngitsut, aammalu ulorianartorsiorfiusuni taakkua qanitaanniittuni angalaartoqartariaqanngitsoq, nalunaarummi allassimavoq.