Nutaamik isumaqatigiissusiornikkut Greenland Oil Spill Response suliassaqartinneqalersoq
Ingerlatseqatigiiffik amigartooruteqarfiusumik ingerlasoq Greenland Oil Spill Response, Naalakkersuisut Illersornissaqarfiullu isumaqatigiissuteqarnerisigut arlalinnik suliassaqartinneqalerluni ikiorserneqarsimavoq.
- Greenland Oil Spill Response A/S-imi (GOSR) nuannaarutigaarput, Kalaallit Nunaata imaani avatangiisit nukittorsarneqarneranut atatillugu isumalluutinik ataatsimoorussilluni suleqatigiinnissamik isumaqatigiissuteqarsimanerat, suliffeqarfimmi pisortaaneq Klaus Kuch Jensen Sermitsiaq.AG-mut allappoq.
Suliassat suliffeqarfiup isumagisassaasa ilaat tassaapput:
GOSR-imi ulloq unnuarlu oqarasuaatikkut pigaartuuneq.
GOSR-ip atortuisa Illersornissaqarfiup Kalaallit Nunaata imartaani upalungaarsimanissamut pilersaarutaanut ilanngunneqartarnissaat.
Illersornissaqarfiup imaani mingutsitsisoqarsinaaneranut akiuiniarnermi atortuisa GOSR-ip immikkoortortaqarfiiniitinneqassasut (maannakkut Nuummi Aasiannilu).
Illersornissaqarfiup imaani mingutsitsisoqarsinnaaneranut akiuiniarnermi atortuinik GOSR-ip immikkoortortaqarfiiniittunik nalinginnaasumik aserfallatsaaliuisarnissaq.
GOSR pillugu
Cairnsip 2012-imi misileraalluni qillerisaqattaarneranut ilassutitut ingerlatseqatigiiffik pilersinneqarpoq. Cairnsip uuliakoortoqarneranut akiuiniarniermi atortuni Namminersorlutik Oqartussanut tunniussimavai. Tamatuma kingorna inatsisitigut aalajangersarneqarpoq, ingerlatseqatigiiffiit Kalaallit Nunaata imartaani uuliamik ujaasisut tamarmik, Greenland Oil Spill Responsemi ilaasortaasassasut.
- Isumaqatigiissut sooruna GOSR-ip aningaasaqarneranut pingaarutilipilussuuvoq, ukiormi kingulleq ingerlatseqatigiiffimmut nalinginnaasumik tapiissuteqarsimasut amerlagisassaanngimmata, pisortaq oqarpoq.
- Tamatuma saniatigut nuannaarutigaarput, isumaqatigiissutitigut periarfissinneqarmat illerornissaqarfimmi sulisut GOSR-imilu namminneq piumassutsiminnik uuliakoortoqarnerani suleqataasartut ataatsimoorlutik sungiusarsinnaanissaat. Tamatuma qularnanngitsumik GOSR-imi piginnaasat qaffassaaqataaffigissavai, namminnerlu piumassusertik malillugu upalungaarsimasuutitatsinnut ilanngukkusuttoqarnerulersitsinissaa neriunarpoq, Klaus Kuch Jensen itisiliivoq.
Ingerlatseqatigiiffik 2018-imi 2019-imilu én million koruunit missaannik kaaviiaartitaqarsimalluni, tre millioner koruuningajalluinnarnik amigartooruteqartarsimavoq.