qinersineq
Nusuka: Tunisassiorfinnik puttasunik pilersitsisoqarli aamma Ini nutarteriffigineqarli
Nunaqavissut Suliffiutillit Kattuffiata neriuutigaa Naalakkersuisuutitaqalersut innuttaasunut kiffartuussineq aallartissagaat. Inissiaatileqatigiiffiup Inip nutarterneqarnissaa kiisalu tunisassiorfinnik puttassunik pilersitsisoqarnissaa siunnersuutigaat
Nunatsinni sutigut tamatigut siuarsaasoqarnissaa pisariaqartinneqarpoq.
Nunaqavissut Suliffiutillit Kattuffiata Nusuka qinersinermut oqaaseqaateqarpoq.
- Tamakkullu ataatsimoorluta inuiaqatigiit tamatta suleqatigiilluta suliarissavagut. Qineqqusaarnermi partiinit tamanit oqariartuutigineqartartut ilagivaat sanaartornerup sineriak tamaat piartumik aallartinneqarnissaa aammalu suliffeqarfiit mikisut aammalu akunnattut suliassaqarnissaat pingaaruteqartutut eqqartorneqarpoq aammalu piaartumik aallartinnissaa pisariaqarpoq, siulittaasoq Gerth B. Lynge oqarpoq.
Nusuka-mit Inatsisartunut qinigaasut Naalakkersuisunngortussallu tamaasa pilluaqquai.
Ini tunisassiorfiillu
Gerth B. Lynge oqarpoq Inissiaatileqatigiiffik Ini nutartertariaqalersoq.
- A/S Ini suliassanik agguaasarnera nutarterneqassaaq piaartumik pisariaqarpat ingerlatinnerit tamakkiisumik kommmunini ingerlanneqassaput aamma ilinniartoqarnermut piumasaqaateqalernissaa angusariaqarpoq. Nalunngilarput A/S Ini qanoq suliffeqarfinnut mikisunut aammalu akunnattunut nunatsinni pigineqartunut pingaaruteqartigisoq. Taamaattumik nutaamik piaartumik sutigut tamatigut nutarternissaa pisariaqarpoq tassuungalu suleqataanissatsinnut piareersimavugut.
- Aalisarnerup aalisakkanillu nunatsinni nalitusaanissaq siunnerfigalugu nutaamik nunaqavissut tunngavigalugit aaqqissuunneqarnisaanut Nusuka-miit suleqataanissatsinnut piareersimavugut.
- Piaartumik aalangerneqassaaq suliffeqarfiit inuiaqatigiit pigisaat sumiluunit unammilleqatigiiffiusumi namminersortunik unammillertassanngillat tamannalu piaartumik unitsinneqassaaq.
- Tunisassiorfiit puttasut ammasumik eqqartorneqarnissaanut piareersimavugut tassami nunami tunisassiorfinnut piumasaqaatit annertuumik aporfigivaat talittarfiit, erngup aammalu innaallagissap tungaasigut piffinni tamangajanni amigaataanerat tamannalu tunisasiorfiit ingerlalluarnissaannut aporfiuvoq annertooq taamaattumik tunisasiorfiit puttasut eqaatsumik nikissinnaasut eqqartortariaqarpagut, Nusukami siulittaasoq oqarpoq. Sulinermi avatangiisinut inatsisip tamakkiisumik Nunatsinnit oqartussaaffigilernissaa piaartumik oqartussaaffigineqalernissaa aamma sulissutigineqartariaqartoq oqaatigaa.