Nunninnermi atortorissaarut GPS Nuummi atorneqarsinnaanngitsoq

Satellit aqqutigalugu nunninnermi atortorissaarutip Savalimmiuni mittarfik miffingiuminarnerulersissimavaa, atortorissaarulli Nuummi atorneqarsinnaanngilaq, Kalaallit Airports ilisimatitsivoq

Savalimmiuni mittarfik Vágar miffingiuminarninngorsimavoq, satellit GPS-ilu atorlugit nunninnermi atortorissaarut RNP (Required Navigation Performance), nunninnermi atortorissaarummik nalinginnaasumik atorneqartartumik, ILS, peqateqartillugu atorneqartalermat. Atortorissaarut Savalimmiuni timmisartuutileqatigiiffimmit Atlantic Airwaysimit SAS-imillu atorneqartarpoq.

Ilisimatitsiniarluni ataatsimiisitsinissaq

Kalaallit Airports unnugu Hotel Hans Egedemi Nuummiittumi arfineq-marlunut mittarfiliorneq pillugu ilisimatitsiniarluni ataatsimiisitsissaaq.

SAS angallannerpaaffiusumi Københavnip Vágarillu akornanni sapaatip akunneranut qulingiluariarluni angalasartoq, mittarfimmut putsertaqisumut Atlantikup qeqqaniittumut ajornanninnginnerusumik missinnaanngorsimavoq, SAS-imi Network Manager Johan Laurberg Lund Kofoed oqaluttuarpoq.

- Aasaq ulluni aqqanilinni Vágarimut missinnaanitsinnut atortorissaarut RNP pingaaruteqarluinnarsimavoq, SAS-imi Network Manager Johan Laurberg Lund Kofoed oqaluttuarpoq.

Pujoq ussittupilussuaq missinnaasimaneq

- Savalimmiut juulip aqqarnaniit 14-ianut ussittupilussuarmik putsertarsimavoq, timmisartuutitsinnili Airbus A320 neo-mi RNP-mik atortorissaaruteqarnerput pissutigalugu missinnaasarsimavugut.

Savalimmiuni atortorissaarummik RNP-mik atuisarneq misilittagaqarfigilluarneqaraluartoq, Nuummi mittarfiup allilerneqarneranut atatillugu atortorissaarummik atuilernissamik Kalaallit Airports pilersaaruteqanngilaq, naak Nuummi silarlukulaaraluartoq. Atortorissaarut Nuummi atorneqarsinnaanngilaq, Kalaallit Airportsimi pilersaarusiornermi pisortaagallartoq Aviaaja Karlshøj Knudsen oqaluttuarpoq.

- RNP atorlugu ingerlatsisoqarsinnaanersoq nalilersorneqarsimavoq. Tamannali ajornarsimavoq, tassa eqqoqqinnaartumik nunnittoqassappat Nuuk satellitsikkut naammattumik atassuserneqarsinnaanngimmat. KAIR aamma ILS CAT I-mik ikiorteqarluni mittarfilionermi taamatulli angusaqarpallaarsimanngilaq.

Assigiinngissutaasoq

Atortorissaarutit taakku marluk assigiinngissutaat tassaavoq, ILS atorlugu mittarfimmi titarneq narlusoq maleqqissaarlugu taamaallaat mittoqarsinnaanera, atortorissaarulli RNP atorlugu sangusaaraluarluniluunniit mittoqarsinnaalluni.

- Anorip aqqutaa avaqqullugu minniaraanni tamanna iluaqutaakkajuttarpoq, taamalu eqqissisimanarnerusumik mittoqarsinnaalluni, Johan Laurberg Lund Kofoed oqaluttuarpoq.

Piviusoq

Atortorissaarut RNP atorlugu minniaraanni mittarfiup isuini naaralaartitsivinnik ikkussisoqartariaqanngilaq, timmisartortartoq isikkiviluttumi minniaraangami GPS atorlugu missinnaavoq. Atortorissaarut taanna atortorissaarutinut ILS-iusunut sanilliullugu ptsaanerujussuarmik mitsitsisinnaavoq.

Timmisartortartup ILS CAT I (Instrumentlandingssystem kategori 1) atorlugu minniaruni, timmisartup nunamiit 60,96 miiterisut qutsitsigisumiinnerani miffissaq 550 miiterisut ungasitsigisumiit takusinnaasariaqarpaa. Takusinnaanngikkuniuk kaaveqqaartariaqassaaq misileeqqillunilu, imaluunniit allamut silaginnerusumut mikkiartortariaqqassalluni.

Timmisartortartut atortorissaarutinik taakkunannga marlunnik atuinissamut allagartaqartariaqarput.

Tasiilami anorersuarnissaanik aarlerisaarut

DMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...

Snow Fest-imi iluatsilluartumi nutaaliorsinnaaneq nuannaarutigineqarpoq

Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...

Powered by Labrador CMS