NUNGUPPUT: Qaammatip tulliani Danmarkimit bilitseqanngilaq
Piffissami matumani Danmarkimit Nunatsinnut timmisartumut aggustip tungaanut bilitsimik pisisoqarsinnaanngilaq. Angallannermi killilersuinermik tamanna pissuteqartoq, Air Greenland ilisimatitsivoq, ungasinngitsukkullu qasukkarneqarnissaat neriuutiginerarpaat.
Air Greenlandip nittartagaani qaammatip tulliani Københavnimit maanga nunamut timmisartornissamik ujaasigaanni ima nalunaartoqartarpoq: Angalaffigiumaneqartut nungupput.
- Maannakkorpiaq Københavnimit Kangerlussuarmut juulimi bilitsinik tuniniagaqanngitsoq ilumoorpoq, oqartussammi tikinnermi killilersuinerit juulimi suut atuutissanersut suli nalunaarutiginngimmatigit, Air Greenland Sermitsiaq.AG-mut ilisimatitsivoq.
Imaanngilaq Air Greenlandip inuit maanga angallakkumanngimmagit, kisianni sapaatip-akunneranut ilaasut amerlanerpaamik 810-t tikissinnaanerannik suli killilersuisoqarnera pissutaavoq, taanna juunip 30-ata tungaanut atuuppoq.
- Covid-19-mut tunngatillugu pissutsinut oqartussat illersorsinnaasutut nalilerpassuk, Air Greenland inissanik amerlanerusunik neqerooruteqarnissamut piareersimavoq, Air Greenlandip attaveqarnermut pisortaa Katja Vahl oqarpoq.
Akiuussusersuinerit ingerlapput
Akiuussusersuinerit ingerlapallapput, 20.000-niillu amerlanerit siullermeerlutik kapitereerput, 10.000-niillu amerlanerit marloriarlutik kapitereerlutik tamakkiisumik akiuussuserneqareerput.
Kisianni ammavinnissamut naammanngilaq. Aasaanerani juulimi sulinngiffeqarfiup nalaani killilersuinerit qanoq ikkumaarnersut, Namminersorlutik Oqartussat suli nalunaarutiginngilaat.
Sermitsiaq.AG-p paasissutissaatai naapertorlugit sapaatip-akunnerata tulliata aallartinnera sioqqullugu killilersuinerit pillugit nutaamik nalunaaruteqartoqarnianngilaq.