Nunavummi tunillaassuunneq Nunatsinnit ernumanartinneqartoq
Taama amerlatigisut covid-19-imik tunillanneqarsimanerat annilaarnarpoq, uippallernissamulli pissutissaqanngitsoq, Nunavummi oqartussat oqaatigaat. Canadami naalagaaffiup immikkoortua taanna sapaatip akunnerani kingullermi pingasunngormalli matoqqatinneqarpoq. Nunatsinni Nunatta Nakorsaaneqarfiata tunillaassuunneq malinnaaffigeqqissaarpaa.
Canadami naalagaaffiup immikkoortuani Nunavummi covid-19-imik tunillanneqarsimasut sapaatip akunnerini kingullerni marlunni amerleriarsimaqaat. Ataasinngormat ullaakkut tunillanneqarsimasut 132-t paasineqarput. Aviisi Sermitsiaq taama allappoq.
Taakku amerlanersaat nunap immikkoortuani Kivallirmi Arvianeersuupput, illoqarfimmi tassani 2.800-nik inulimmi 80-it sinneqartut tunillatsissimallutik. Tikeraqjuarmi nunaqarfiup inuinit 403-usunit tunillatsissimasutut 14-it nalunaarsorneqarsimapput. Tunillatsissimasut tamarmik mattusimaneqartut taamaallaallu sakkukitsumik ingasanngitsumillu malunnaateqartut, oqartussanit nalunaarutigineqarpoq.
Nunavut upernaaq tunillaassuuttoqalermalli annerusumik tunillaassuuffiunngikkaluarpoq. Qaammatini arlalinni tunillatsissimasunik naammattuuisoqarsimanngilaq, novembarilli arfernanni Sanikilluarmi, qeqertami Hudsonip Kangerliumanersuaniittumi tunillatsissimasumik siullermik naammattuuisoqarpoq, piffissallu sivikitsup ingerlanerani nunaqarfinni Sanikilluami, Kangiqlinermi, Tikiraqjuarmi aamma Arviani tunillanneqarsimasut 60-it nalunaarsorneqarlutik.
Tunillatsissimasut amerlanerisa kingunerannik sapaatip akunnerani kingullermi pingasunngormat aallartittumik atuarfiit suliffeqarfiillu ulluni 14-ini matoqqatinneqalerput. Piffissami matumani misissuinermi atortussanik nunaqarfinnut tamaaniittunut avammut matoqqaqisunut timmisartukkut qulimiguulinnillu apuussiniarsaripput; tamannali apineranit aamma 30-t angullugit issinneranit ajornakusoortinneqaqaluni.
Canadami nalinginnaasumik amerleriaateqartut
Tunillaassuunneq Nunavummut qanoq ililluni anngussimanersoq, maannamut suli paasineqanngilaq, nunaqarfiimmi upernaarli matoqqatinneqaraluarmata. Tunillatsissimasulli amerleriarnerat pilluni Canada tamakkerlugu nalinginnaasumik amerleriaateqareersullu, tamatumalu kinguneranik Canadami peqqissutsimut qullersap Dr. Theresa Tamip mianersoqqussutigaa, ”covid-19-ip napparsimmavinni, utoqqaat illuini aamma naggueqatigiit Inuit akornanni tunillaassuunnera ernumanartorujussuummat, tamaanimi najugallit immikkut aarlerinartumik inissisimammata”.
Allaaserisaq aviisimi Sermitsiami atuarsinnaavat, allaaserisallu allat atuarlugit: