Global Teacher Prize
Nunavummi ilinniartitsisoq 1 million dollarsinnattoq
Nunarsuarmi ilinniartitsisuulluarnerpaaq Nunavut illoqarfiani Salluinneersuuvoq. Meeqqanut suliniutini pillugit Maggie McDonnell 6,9 mio koruuninik pissarsissutigaa.
Nunavummiu Maggie McDonnellsi imminut nunarsuarmi ilinniartitsisuullatsialattut taasinnaalerpoq – mio-passuarnillu aningaasaateqalerluni. Global Teacher 2017-mimi ajugaasutut toqqarneqaqqammerpoq taannalu 1. mio dollarsinik aningaasartalimmik. Nunatsiaqonline taama allaaserinnippoq.
Maggie McDonnellsip ilinniartitsisuuffigisaani najuqartut 1300-put, illoqarfimmilu suliffissaaleqineq, atornerluineq imminullu toquttarneq ajornartorsiutaasorujussuupput.
Atuaruk: Ilinniartitsisut eqiasuttut amerlavallaarput
Ulloq naallugu ilinniartitsisoq
Maggie McDonnellsip meeqqanut sulinuteqarnini kisiat pinnagu innuttaasunulli suliniuteqarsimanini nersorneqassutigaa.
- Issittumi inuiaqatigiinni amerlanngitsuni ilinniartitsisuussagaanni suliffik uninngisaannarpoq. Atuarfik matusaraluarpoq, innuttaasullu ikikkaangata atuartunut attaveqarneq ingerlaannartarpoq, Maggie McDonnellsi globalteacherprize.com-imut nassuiaavoq
Pikkunneqartuni 20.000-nit nuna tamalaanit 179-nik Maggie McDonnellsi ajugaasuuvoq. Kajummissutsiminnik suliniaqatigiiffinnut, NGO, inuusuttunut kulturimullu tapersersuisunut aningaasat atorneqassasut paasissutissiivoq.