Nunatta urania Danmarkip qulakkiissavaa

Kalaallit Nunaat uranimik avammut tuniniaalissappat Danmarkip qulakkiissavaa uranip ajortumut atorneqannginnissaa.
Taamatut oqaluttuarpoq DIIS-imi ilisimatooq Cindy Vestergaard, sakkussarsuit siammarsarneqannginnissaannik immikkut ilisimasalik.
– Naalagaaffiit tamarmik, Kalaallit Nunaannit uranimik pisiniartut Københavnimukassapput isumaqatigiissuteqarniarlutik, taanna oqarpoq.
Sisamanngormat Inatsisartuni amerlanerussuteqaqqalaartut uranimut atortussiassanullu allanut radiop qinngornerinik ulorianartunik akulinnut akuersaanngilluinnarnerup atorunnaarsinneqarnissaa akuersissutigaat.
Kalaallit Nunaat siunissami uranimik avammut tuniniaasalissappat urani kalaallit kisimik oqartussaaffigissanngilaat. Kunngeqarfiup Danmarkip nunat, Kalaallit Nunaannit uranimik pisiniartut, isumaqatigiissuteqarfigisassavai.
– Qallunaat naalagaaffiata aalajangissavaa piumasaqaatit suut atorlugit uranimik tunisissanerluni, naalagaaffinnullu sorlernut uranimik tuniserusunnerluni, taanna oqarpoq nangillunilu:
– Ernumanartoqarpoq urani qaartartorsuarnut atomitortunut atorneqarsinnaasoq imaluunniit nunanut qaartartorsuarnik atomitortunik sananiartunut pisinnaanera ernumagaarput.
Atuaruk "Thorning: Uranimik avammut tuniniaaneq Danmarkip aalajangissavaa"
Siammarterinnginnissamik politikki atorfissaqartinneqarpoq
Tassami ulorianartoqarpoq allat aqqutigalugit urani anngiortumik tuniniaavimmut pisinnaasoq. Taamaattumik ilisimatooq isumaqarpoq pilersuinissamut Danmarki piumasaqaasiussasoq, tassuuna qulakkeerneqassalluni uranip eqqissisimasumik siunertanut atorneqarnissaa.
– Qallunaat naalagaaffiat siammarterinnginnissamut politikkimik ineriartortitsissaaq, ilisimatooq oqarpoq.
Taasinissaq sioqqullugu inuussutissarsiornermut, aatsitassanut sulisartoqarnermullu Naalakkersuisoq Jens-Erik Kirkegaard, Siumut, Inatsisartut aatsitassanut ataatsimiititaliaanut akissummini naliliivoq uranimik avammut tuniniaasalernissaq ukiut marlussuit qaangiuppata pisinnaaleriissasoq.